У Беларусі крыху запаволілася інфляцыя — знізіўся ўнутраны попыт
З 6 кастрычніка ў Беларусі забаранілі павышаць цэны / БЕЛТА
У верасні ў Беларусі крыху запаволілася інфляцыя, адзначаюць эксперты Еўразійскага банка развіцця. За год — з верасня 2021 па верасень 2022 года — цэны выраслі ў сярэднім на 17,4%. У жніўні гэты паказчык быў 17,9%.
На запаволенне інфляцыі паўплывала некалькі фактараў: падзенне ўнутранага попыту і "карэкцыйнае ўмацаванне беларускага рубля да расійскага". Плюс запаволіўся і рост цэнаў на адміністрацыйна рэгуляваныя тавары і паслугі.
На думку экспертаў, "узмацненне рэгулявання цэнаў можа прывесці да далейшага запаволення інфляцыі" і ў наступныя месяцы. Але захоўваецца і "праінфляцыйны ціск" — растуць выдаткі на правядзенне фінансавых транзакцый, пастаўку тавараў і камплектавальнікі.
Аляксандр Лукашэнка правёў 6 кастрычніка нараду аб сітуацыі ў эканоміцы і запатрабаваў замарозіць цэны. За парушэнне гэтага патрабаванне прыгразіў крымінальнымі справамі. Ужо завялі некалькі крымінальных спраў.
