У Беларусі скарачаецца спажыванне прыроднага газу — Мінэнерга

За сем месяцаў гэтага года аб'ём спажывання прыроднага газу ў Беларусі склаў 85% да аналагічнага перыяду мінулага. У Мінэнерга кажуць, што па выніках года аб'ёмы спажытага газу складуць 16,7 млрд кубічных метраў. А летась гэты паказчык быў 19 млрд кубічных метраў.

Па словах міністра энергетыкі Віктара Каранкевіча, асноўным фактарам зніжэння спажывання прыроднага газу стала работа БелАЭС. З моманту ўключэння ў энергасістэму першага энергаблока ў лістападзе 2020 года БелАЭС выпрацавала 18,5 млрд кВт/г электраэнергіі — гэта дазволіла замясціць каля 5 млрд кубічных метраў газу. З уводам другога энергаблока атамная станцыя зможа замяшчаць гэтыя 5 млрд кубічных метраў газу штогод.

Акрамя БелАЭС на скарачэнні спажывання газу ўплываюць "і рэалізаваныя ў краіне мерапрыемствы па энергазберажэнні і энергаэфектыўнасці, павелічэнне выкарыстання мясцовых відаў паліва, перавод асобных цеплакрыніц на фрэзерны торф, дранку і пялеты", кажуць у Мінэнерга.

Адзначым, што і будаўніцтва, і эксплуатацыя БелАЭС пастаянна суправаджаюцца інфармацыяй аб рознага кшталту надзвычайных здарэннях. Станцыю будуюць па расійскім праекце і пад наглядам расійскіх спецыялістаў.