У Беларусі за суткі патанулі 10 чалавек, у тым ліку дзіця

За суткі ў вадаёмах Беларусі патанулі 10 чалавек, у тым ліку адно дзіця, паведамляе БЕЛТА са спасылкай на МНС краіны.

З пачатку года колькасць ахвяраў на вадзе склала ўжо 174 чалавекі, з іх 10 — гэта дзеці. Ільвіная доля загінулых (72 чалавекі) прыйшлася на Чэрвень.

Адна з апошніх такіх трагедый адбылася ва Уздзенскім раёне. Надоечы тут патанулі 48-гадовая жанчына і 7-гадовы хлопчык, якім яна апекавалася. Прычыны пакуль невядомыя, але, паводле папярэдніх звестак, напярэдадні трагедыі загінулая ўжывала спіртное, сцвярджаюць у СК Беларусі.

Паводле словаў ратавальнікаў, асноўнымі прычынамі гібелі на вадзе ў Беларусі застаюцца купанне ў нецвярозым стане і ў забароненых месцах, а таксама пакіданне дзяцей без нагляду.