У бліжэйшыя дні ў Беларусь прыйдзе антыцыклон з поўначы

У аўторак, 21 жніўня, у Беларусі чакаецца пераменная воблачнасць, перадае Белгідрамет. Месцамі пройдуць кароткачасовыя дажджы, у асобных раёнах навальніцы. Вецер прагназуецца паўднёва-заходні з пераходам на паўночна-заходні ўмераны да парывістага. 

Уначы і зранку тэмпература паветра будзе +13...+19 градусаў, удзень чакаецца ад +20 па паўночным захадзе да +26 па паўднёвым усходзе.

22 жніўня надвор'е будзе вызначаць антыцыклон, сфармаваны ў паўночных шыротах. Будзе пераважна без ападкаў. Уначы вецер прагназуецца паўночна-заходні ўмераны, днём няўстойлівы слабы. 

Спёка спадзе. Уначы будзе 6-13 вышэй за нуль, удзень чакаецца ад +17 па паўночным усходзе да +24 па паўднёвым захадзе.