У цыстэрне беларускага цягніка ў Латвіі знайшлі 3 млн кантрабандных цыгарэт
Хованку з цыгарэтамі выявілі латвійскія мытнікі на таварнай станцыі Даўгаўпілс у грузавым цягніку, які прыбыў з Беларусі, паведамляе baltnews.lv.
У адной з цыстэрнаў яны знайшлі схаваныя кардонныя скрынкі, абгорнутыя чорнай поліэтыленавай плёнкай. Скрынкі былі запоўненыя цыгарэтамі маркі "NZ Gold" без акцызных марак. Агулам было тры мільёны цыгарэтаў.
Паведамляецца, што хованка была зробленая ў цыстэрне, запоўненай бітумам. Калі праніклі ўсярэдзіну цыстэрны, то выявілі, што бакі рэзервуара аддзеленыя ад іншага грузавога памяшкання фанернымі перагародкам. За імі і знаходзіліся хованкі з кантрабандным грузам.
