Праваабаронца Алесь Бяляцкі затрыманы на 72 гадзіны па крымінальнай справе
Праваабаронца Алесь Бяляцкі затрыманы па крымінальнай справе на 72 гадзіны (па якой менавіта, невядома). Ёй займаецца Цэнтральны апарат Следчага камітэта, паведамляе @viasna96.
Бяляцкі — кіраўнік пазбаўленага рэгістрацыі ў Беларусі праваабарончага цэнтра “Вясна”. Сувязь з ім знікла яшчэ раніцай у сераду. Увечары ж стала вядома і пра затрыманне, і пра крымінальную справу.
Алесю Бяляцкаму 58 гадоў. Праваабарончы цэнтр ён арганізаваў у 1996 годзе. У 2011-2014 гадах знаходзіўся ў зняволенні, быў прызнаны палітвязнем.
14 ліпеня ператрусы прайшлі ў офісах і ў кватэрах сябраў ПЦ "Вясна". На 72 гадзіны затрыманыя і іншыя вясноўцы, сярод іх — намеснік старшыні "Вясны" Валянцін Стэфановіч. Яны знаходзяцца на Акрэсціна.
