У Эквадоры паранілі беларуса — ён спрабаваў выратавацца ад рабаўнікоў
Паліцэйскі на вуліцы Мачалы / Cortesía
У Эквадоры ад рабаўнікоў пацярпеў грамадзянін Беларусі. Ён падарожнічаў з сябрамі на прыватным судне, піша рэсурс "Беларусь і свет". 28 лютага сябры вырашылі агледзець горад Мачала, які называюць бананавай сталіцай — адсюль бананы з Эквадору экспартуюцца па ўсім свеце.
Беларус з сябрамі выйшлі з порта, дзе пакінулі сваё судна, і накіраваліся па галоўнай вуліцы да помніка Эль-Бананэра. Нападнікаў было трое — двое перасоўваліся на матацыкле, яшчэ адзін пешшу. Адзін з нападнікаў дастаў зброю і прыгразіў беларусу, запатрабаваў грошы. Мужчына кінуўся бегчы. Нападнік стрэліў у яго і параніў у пятку.
Беларус тым не менш здолеў узяць таксі і дабрацца да порта. Там яму аказалі першую дапамогу, а затым адвезлі ў прыватную клініку. Далей пацярпелым ужо займаліся медыкі.
