У Гомелі плануюць пабудаваць першы ў Беларусі калумбарый для жывёлаў
Кот з фільма "Могілкі хатніх жывёлаў"
У Гомелі плануюць пабудаваць першы ў Беларусі калумбарый для жывёлаў. Пра гэта расказаў дырэктар КУП "Спецкамунтранс" Валерый Ткачоў.
Крэматорый і калумбарый могуць з'явіцца на тэрыторыі пункта часовага ўтрымання жывёлаў. Па словах чыноўніка, цяпер распрацоўваецца архітэктурна-планіровачная схема аб'екта.
Цяпер у Беларусі адсутнічаюць зарэгістраваныя могілкі хатніх жывёлаў. Няма і калумбарыяў. Хаця многія ветэрынарныя клінікі прапануюць крэмацыю гадаванцаў, пасля якой гаспадарам выдадуць іх прах.
Далей у людзей ёсць выбар: пакінуць урну на неафіцыйных могілках хатніх жывёлаў (яны ёсць у многіх буйных гарадах), на ўласным участку або на палічцы ў доме. Афіцыйна "пахаваць" хатнюю жывёлу немагчыма: закон "Аб пахаванні і пахавальнай справе" не распаўсюджвае сваё дзеянне на пахаванне хатніх жывёлаў.
