У Гродне легкавік на расійскіх нумарах не саступіў дарогу міліцэйскаму УАЗу

У Гродне легкавік Hyundai на расійскіх нумарах не саступіў дарогу міліцэйскаму УАЗіку, у выніку чаго адбылося сутыкненне. Як паведамляе NewGrodno.by, здарэнне адбылося ў ноч на 20 студзеня.

Міліцэйская машына ішла ў простым кірунку па праспекце Касманаўтаў, а Hyundai стаў перасякаць праспект з боку вуліцы Пралетарскай. Уначы святлафоры на гэтым адрэзку вуліцы не працуюць, таму кіроўцы абавязаныя сачыць за дарожнымі знакамі.

Праспект Касманаўтаў з’яўляецца галоўнай дарогай у дачыненні да вуліцы Пралетарскай, таму кіроўца машыны з расійскімі нумарамі абавязаны быў даць перавагу міліцыі.

У выніку здарэння машыны атрымалі пашкоджанні, але ніхто з людзей не пацярпеў.