У Гродне ў судзе над палітвязнем Пачобутам пачалі дапытваць сведак
Анджэй Пачобут у судзе / БЕЛТА
Гродзенскі абласны суд працягвае разглядаць у закрытым рэжыме крымінальную справу палітвязня і журналіста Анджэя Пачобута. Як піша БЕЛТА, у сераду пачалі дапытваць сведак.
Пачобута абвінавачваюць у закліках да санкцый і ў "распальванні сацыяльнай варожасці" ("садзейнічаў гераізацыі Арміі Краёвай"). Яму пагражае да 12 гадоў пазбаўлення волі.
Суд пачаўся 16 студзеня. Суддзя — Дзмітрый Бубенчык.
Анджэй Пачобут быў затрыманы 25 сакавіка 2021-га разам з іншымі актывістамі польскай меншасці. З таго часу ён застаецца за кратамі: спачатку ў жодзінскай следчай турме, пасля — у СІЗА № 1 у Мінску, з верасня 2022-га — ў СІЗА ў Гродне. Палітвязню прапаноўвалі напісаць прашэнне аб памілаванні, але ён адмовіўся.
