У Кіеве не агучваюць інфармацыю, колькі абаронцаў засталося на "Азоўсталі"

17 траўня ў Дзярждуме Расіі заклікалі не абменьваць байцоў палка "Азоў". Аднак у Мінабароны Украіны лічаць, што насамрэч гэтая заява "накіравана на ўнутраную прапаганду" ў РФ. Кіеў працягвае заяўляць, што "аперацыя па выратаванні цяпер працягваецца". Міністр абароны Аляксей Рэзнікаў сказаў, што абаронцам Марыупаля дадзены загад "захаваць свае жыцці". Паводле яго слоў, перамовы з расійскім бокам ідуць з удзелам Чырвонага Крыжа. Расійскі бок пра перамовы пакуль нічога не паведамляе.

Рэзнікаў фактычна пацвярджае, што 264 украінскія вайскоўцы цяпер у палоне, калі кажа наступныя словы: "Наш план — захаваць ім жыццё, а пасля — свабоду". Пры гэтым украінскі міністр нічога не сказаў пра тых абаронцаў, якія застаюцца на "Азоўсталі". Ці працягнуць яны абарону, ці будзе працягвацца так званая "эвакуацыя"? Напярэдадні камандзір палка "Азоў", Герой Украіны Дзяніс Пракапенка ў відэазвароце заявіў, што яны выконваюць рашэнне Кіева, а якое, не стаў расшыфроўваць.

Сярод абаронцаў "Азоўсталі" не толькі байцы "Азова", там таксама ёсць марскія пехацінцы, памежнікі, паліцэйскія, байцы тэрытарыяльнай абароны. Была інфармацыя пра групу беларусаў, якая ўдзельнічала ў абароне Марыупаля.