У Мінску выкрылі карупцыйную сетку рыэлтараў і забудоўшчыкаў

Гаворка ідзе пра незаконны продаж новых кватэр у сталіцы, піша "Ежедневник".

Сярод рыэлтараў галоўным фігурантам справы стала найбуйнейшае і найстарэйшае агенцтва нерухомасці сталіцы "Дзінас". Падазронай па справе праходзіць намесніца дырэктара ТАА "ДзінасІнвест" Алена Тумайкіна. Яе вінавацяць у падбухторванні да дачы хабару.

Як піша "Ежедневник", пры будаўніцтве шматкватэрных дамоў па долевым прынцыпе забудоўшчыкі некаторыя кватэры прадавалі "налева" за хабар. Ёсць звесткі, што карупцыйныя сляды гэтай сеткі цягнуліся ў Мінгарвыканкам. Але пакуль там нікому абвінавачанне не выставілі, у адрозненне ад службовых асобаў забудоўшчыкаў і рыэлтарскіх агенцтваў.

Ужо цяпер вядома, што ў злачынную дзейнасць былі ўцягнутыя службовыя асобы як мінімум трох буйных кампаній-забудоўшчыкаў, а таксама рыэлтары некалькіх агенцтваў.

Карупцыйная сетка дзейнічала ў Мінску як мінімум з 2009 года. Колькі кватэр за гэты час сышло налева, сказаць пакуль складана.

Фота — vsluh.ru