У Мінску здарэнняў з-за першага снегу стала менш

Першы снег выпаў на месяц пазней, чым летась, ды сіноптыкі папярэджвалі загадзя. Але паслугамі эвакуатара 25 лістапада скарысталіся многія.

"Учора ўвечары былі дарожна-транспартныя здарэнні. Нехта ў слуп, нехта у сустрэчную. Але менш, чым у мінулым годзе", — кажуць Еўрарадыё ў службе help9999.by.

А вось зводка ДАІ кажа, што 27 кастрычніка 2012 года, калі выпаў першы снег, здарыліся 102 ДТЗ, а 25 лістапада 2013 — 125 ДТЗ. Але гэта агульная колькасць аварый, колькі з-за снегу — невядома. Але 25 лістапада здарэнняў было ў 2 (!) разы больш, чым 24 лістапада.

Дапамогай службы evacuator.by амаль ніхто не скарыстаўся. У 2012 годзе, як толькі выпаў снег пачаліся званкі, бо людзі выехалі на летняй гуме.

"Цяпер проста канкурэнцыя вялікая. Шмат людзей купілі эвакуатары і можа з-за гэтага замоваў не было. Учора была замова, а сёння пакуль не".

Аўтасервісы гавораць, што званкі па пашкоджаннях былі, але пакуль ніхто не прыязджаў, бо чакаюць выплаты страхоўкі.

Вялікіх чэргаў на шынамантажах… таксама няма! У службе pit-stop.by распавядаюць, што запісацца можна хоць на заўтра.

"Але я не думаю, што людзі загадзя патурбаваліся і зрабілі шынамантаж. Думаю яшчэ ўсё наперадзе".

У аўтасервісе carservice.by, кажуць, што большасць пераабулася у зімовае загадзя, таму зараз у чарзе на шынамантаж толькі дзве машыны. Але 25 лістапада невялікія чэргі з'явіліся.

"Відаць, што ў першы снег акуратней людзі ездзяць, а потым прывыкнуць і пачнуць менш асцярожна ездзіць, і стане больш наступстваў", — лічаць у іншым аўтасервісе.

Але ж відавочна, што сёлета аварый, звязаных са снегам, павінна быць меней. Бо ў 2012 годзе снег пачаўся ў абед, а сёлета ўвечары, калі многія паспелі даехаць з працы дадому. Хаця пробкі ўвечары былі вялікія. Да таго ж, сезон зацягнуўся і многія ўсё ж паспелі памяняць гуму.