У Нацбанк шукаюць супрацоўніка, якому можна давяраць
Кіраўнік Нацбанка Павел Калаур (злева) сёння з дакладам у Аляксандра Лукашэнкі / president.gov.by
Каб прэтэндаваць на пазіцыю ў Нацбанку, прафесійных ведаў недастаткова. Сярод патрабаванняў ёсць і такое: "Адсутнасць на працягу апошніх двух гадоў фактаў скасавання працоўнага дагавора (кантракта) па ініцыятыве наймальніка ў выпадку здзяйснення віноўных дзеянняў, якія з'яўляюцца падставай для страты даверу з боку наймальніка".
Гэта цытата з вакансіі, размешчанай на сайце Нацыянальнага банка Беларусі. Шукаюць намесніка начальніка аддзела рэагавання на камп'ютарныя пагрозы.
Прычым адсутнасць звальнення "за страту даверу" — гэта патрабаванне. А веданне англійскай мовы і досвед у галіне аперацый з пластыкавымі карткамі толькі "вітаюцца".
Пасля пратэстаў 2020 года ў самых розных арганізацыях і прадпрыемствах пачаліся "чысткі" — кіраўніцтва звальняе ці не працягвае кантракты з людзьмі, заўважанымі ў пратэстным руху. "За палітыку" звальнялі нават на заводах.
