У наступным годзе Украіна збіраецца вырабіць мільён дронаў
Украінскі вайсковец на фронце / facebook.com/GeneralStaff.ua
У наступным годзе Украіна збіраецца вырабіць мільён дронаў. Пра гэта ў аўторак на прэс-канферэнцыі ў Кіеве заявіў украінскі прэзідэнт Уладзімір Зяленскі. Ён адзначыў важнасць уласнай вытворчасці дронаў і боепрыпасаў.
"Павінна быць інфраструктура, не савецкая, а простая і зразумелая — і па вытворчасці, і па дастаўцы дронаў на фронт. Я асабіста ў шоку, як можа не даехаць тое, што ўжо выраблена намі", — сказаў Зяленскі.
На думку заходніх ваенных экспертаў, беспілотнікі вельмі змянілі прынцыпы вядзення баявых дзеянняў на вайне ва Украіне, адзначае "Бі-Бі-Сі". У пачатку расійскага ўварвання Украіна мела перавагу ў выкарыстанні дронаў, аднак затым РФ пачала масава вырабляць такую тэхніку, што памяняла баланс сіл (пра гэта кажуць апошнім часам украінскія вайскоўцы, якія ваююць на фронце). Менавіта з-за дронаў, як лічаць эксперты, узброеныя сілы двух бакоў не могуць назапасіць вялікую колькасць ваеннай тэхнікі і войскаў для арганізацыі маштабных аперацый.
