У навагоднюю ноч мінчанін "прыняў салют на грудзі"

У навагоднюю ноч мінчук Багдан Каравец, у літаральным сэнсе "прыняў салют на грудзі". Феерверк, які павінен быў выбухнуць прыгожым шарам ў небе, трапіў дырэктару кампаніі па распрацоўцы сайтаў "Astronim*" у шыю і пакінуў апёкі.

З таго моманту, як наступіў Новы год, не прайшло і гадзіны. Мужчына выйшаў да пад'езда, каб паглядзець, як суседзі запускаюць феерверкі ў двары.

"Я рэальна быў метрах у дзесяці. Стаяў ля пад'езда, нікога не чапаў. А запускаў сусед, — распавядае Багдан. — Яно доўга не узлятала, а потым вырашыла выбухнуць прама на месцы. Салют, які павінен раскрывацца ў небе, раскрыўся прама на зямлі, і адзін з феерверкаў прыляцеў мне прама ў шыю. Паліто было ледзь-ледзь расшпіленае, і ён заваліўся за пазуху. Усе грудзі папаліла".

Па словах Багдана, пры выбуху феерверку ніхто больш не пацярпеў. Людзям, якія стаялі нашмат бліжэй да эпіцэнтра, моцна пашанцавала.

"Я спачатку думаў, што мяне ўдарыла выбуховай хваляй, — працягвае Багдан. — Усё здавалася пацешным, маўляў, "пячэ, с*ка". Але хвілін праз 10 пачало пячы па-сапраўднаму. Я падняўся да сябе і паглядзеў у люстэрка — чорная метка крыху ніжэй за шыю і чырвоная паласа ўніз, усё пачынае апухаць і запаляцца. А праз паўгадзіны там ужо было крывавае месіва. У хуткую датэлефанавацца было складана, таму я рукі ў ногі, і сам паехаў".

Супрацоўнікі МНС у выпадку, калі хтосьці пацярпеў ад выбуху петарды, а датэлефанавацца да медыкаў не атрымліваецца, раяць набіраць 101 або 112. Дыспетчары перанакіруюць таго, хто тэлефануе, у хуткую дапамогу па прамым тэлефоне.

Багдану ж можна толькі паспачуваць: у бліжэйшы месяц яго чакаюць штодзённыя перавязкі.

"Калі падводзіць нейкую рысу, то піратэхніка — тэма стромная. Лепш ад гэтага далей трымацца, таму што не адгадаеш. Плюс ўмовы надвор'я, — робіць свае высновы з гісторыі Багдан. — Ну і, як той казаў, хавайце твар, замотвайце шыю, апранайце пальчаткі, каб пальцы не адарвала, і гэтак далей".

Перад Новым годам МНС выпусціла памятку для аматараў піратэхнікі:

Для дома — максімум бенгальскія агні, астатняй піратэхніцы месца на вуліцы. Эфектна салютаваць з балкона таксама не варта. Для запуску патрэбная адкрытая пляцоўка, свабодная ад будынкаў, дрэў, лёгкаўзгаральных прадметаў. Важныя ўмовы — ціхае надвор'е і адлегласць да ліній электраперадач 30 метраў і больш. Гледачам трэба адысці на адлегласць, названую ў інструкцыі. Падпальваць кнот варта на адлегласці выцягнутай рукі. Пры гэтым накіроўваць салют у бок людзей не варта. Калі ж піратэхніка не спрацавала, не трэба падпальваць яе зноў. Не нахіляйцеся над ёй, каб высветліць, што здарылася.