У Паўночнай Карэі адцэнзуравалі штаны брытанскага вядучага-садавода — #ІхНоравы

27/03/2024 - 15:39

#ІхНоравы / @rubanau_collage

Каб быць прагрэсіўным чалавекам, мала думаць, што Аляксандр Лукашэнка не самы лепшы менеджар. Трэба яшчэ ведаць, чаму сэканд лепш за мас-маркет, напрыклад.

Стараемся трымаць вас у курсе важных навін і прагрэсіўных меркаванняў, не дзякуйце. (Каб вы не з'ехалі з глузду, пра дзіўныя навіны таксама расказваем).

Генацыд?

Эксперт ААН па правах чалавека Франчэска Альбанезэ лічыць, што Ізраіль здзейсніў акты генацыду ў сектары Газа. Ізраіль не прыняў высноў яе дакладу.

"Ёсць разумныя падставы меркаваць, што парог, які паказвае на здзяйсненне генацыду супраць палестынцаў як групы ў сектары Газа, быў дасягнуты", — лічыць Альбанезэ.

Называць штосьці генацыдам можна ў тым ліку тады, калі ў кагосьці ёсць намер знішчыць групу людзей "поўнасцю або часткова" — або стварыць умовы для гэтага. Менавіта гэта Альбанезэ бачыць у дзеяннях Ізраіля ў Газе.

Летась больш за палову ўсіх пакупнікоў купілі штосьці ўжыванае — асабліва шмат іх сярод прадстаўнікоў пакалення Z і міленіялаў. Прычым двое з пяці куплялі ўжыванае, таму што хацелі дазволіць сабе больш дарагія брэнды.

А цяпер яшчэ і лёгка рабіць пакупкі ўжываных рэчаў праз модныя дадаткі кшталту Vinted. Увогуле, эксперты чакаюць, што ў бліжэйшыя пяць гадоў аб'ём анлайн-перапродажаў вырасце больш чым удвая. У тым ліку, таму што цяпер сэканд — гэта прагрэсіўна (прыродзе падабаецца).

Няўдалы дзень для кароў

Амерыканскія каровы захварэлі на птушыны грып. Пазітыўны тэст далі каровы ў двух штатах. Пакуль што гэта першы выпадак птушынага грыпу ў буйной рагатай жывёлы (ні адна карова пакуль не памерла).

Верагодна, птушыны памёт, як бы тут мовіць... патрапіў у каровіну яду. Вось такая двайная непрыемнасць здарылася з амерыканскімі каровамі. Малако ад гэтых хворых кароў, дарэчы, не ўяўляе небяспекі для чалавека.

Не тыя штаны

Дзяржаўны тэлеканал Паўночнай Карэі наклаў цэнзуру на праграму BBC па садаводстве. Ведаеце, што ім не спадабалася? Штаны вядоўцы!

Цэнтральнае паўночнакарэйскае тэлебачанне паказала сваёй аўдыторыі праграму "Сакрэты саду", але не паказала джынсы вядоўцы Алана Тычмарша. Таму што джынсы — гэта сімвал заходняга імперыялізму!

Самога Тычмарша гэта нават усцешыла. Яму 74 гады, і ён сказаў, што ўпершыню ў жыцці адчуў сябе як Элвіс Прэслі або Род Сцюарт. У сэнсе, надзеў штаны, якія чуллівыя людзі могуць палічыць за вельмі модныя.

Шок. Не ўсе панды чорна-белыя

У асноўным гіганцкія чорна-белыя панды... чорна-белыя. Але! Ёсць трошкі карычнева-белых гіганцкіх панд!

Яны жывуць толькі ў адным горным масіве Кітая. Але чаму яны недастаткова чорна-белыя, навукоўцы пакуль так і не высветлілі. Хутчэй за ўсё, прычына ў асаблівасцях клімату. Незвычайная афарбоўка перадаецца ў спадчыну, так што карычнева-белых панд можа стаць больш.

Аўтарам мульціка пра кунг-фу панду прыйдзецца перагледзець сцэнар!