У Віцебску ў кантэйнеры для смецця знайшлі цела немаўля
Следчыя працуюць на месцы здарэння/ @skgovby
Віцебскія следчыя шукаюць маці дзіцяці, цела якога знайшлі напярэдадні ўвечары на сметніцы. Гаворка ідзе пра немаўля. Хто яго знайшоў, не паведамляецца — "вечарам 9 снежня ў праваахоўныя органы паступіла паведамленне аб выяўленні ў кантэйнеры для смецця ў Віцебску цела немаўля", распавялі ў Следчым камітэце Беларусі.
Раней інфармацыя пра здарэнне з'явілася ў віцебскім телеграм-канале. Падпісчыкі канала паведамлялі, што ў раёне крамы "Віталюр" у мікрараёне Білева "хтосьці выкінуў немаўля ў сметніцу". Адзін з мясцовых жыхароў распавядаў, што да яго дадому прыходзіў следчы, казаў пра здарэнне і цікавіўся, ці не бачыў той што-небудзь.
Следчыя ўжо забралі запісы камер відэаназірання з дамой, размешчаных паблізу. Адказ на пытанне пра прычыну смерці дзіцяці павінна даць судова-медыцынская экспертыза.
Віцебскі гарадскі аддзел СК пачаў праверку па гэтым факце.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
