Уладальніцу атэлье затрымалі за мемы з чорным гумарам і пратэсты 2020-га
Прадпрымальніцу затрымалі за антываенныя мемы / тг-канал сілавікоў
Сілавікі затрымалі ўладальніцу атэлье па рамонце адзення, паведамляе блізкі да іх канал. Яны заяўляюць, быццам прадпрымальніцу "здаў" раней затрыманы мужчына.
На відэа затрыманая жанчына кажа, што прымала ўдзел у акцыях пратэсту ў Мінску ў 2020 годзе. Таксама яна заяўляе, што ў Instagram выкарыстоўвала "мемы з чорным гумарам, якія адносяцца да нашай улады і суседняй дзяржавы".
Па скрыншотах паказаных у відэароліку, можна зразумець, што высмейваліся расійскія вайскоўцы. На адным з малюнкаў бачны мужчына з галавой свінні ў вайсковай форме з літарай Z на грудзях.
Аўтары тг-канала пішуць, што за ўдзел у пратэстах прадпрымальніцы пагражае 5 гадоў пазбаўлення волі, "а ў дачыненні да яе мемаў з прыкметамі распальвання нацыянальнай варожасці праводзіцца дадатковая праверка".
Пазней "Медыязона" паведаміла, што затрыманую завуць Святлана Дзеружкова.
