Volkswagen не закрые свае заводы, а Нолан здыме "Адысею" — #ІхНоравы

24/12/2024 - 15:56

Міжнародныя навіны / @rubanau_collage

Амерыканскі рэжысёр Крыстафер Нолан анансаваў здымкі свайго чарговага фільма. Гэтым разам ён экранізуе "Адысею" Гамера. Дату прэм'еры, а таксама акцёрскі склад вы даведаецеся з нашага штодзённага агляду сусветных навінаў.

На Гаваях пачалося вывяржэнне магутнага вулкана

На Гаваях пачаў вывяргацца адзін з самых актыўных у свеце вулканаў — Кілаўэа, паведамляе Scripps News.

Падвышаная сейсмаактыўнасць вулкана назіраецца з панядзелка — з яго б'е некалькі фантанаў лавы, а ў паветра прыкладна на 80 км падымаецца велізарны слуп попелу і газу.

Для жыхароў вывяржэнне пакуль не ўяўляе небяспекі, бо актыўнасць Кілаўэа цяпер абмяжоўваецца тэрыторыяй Нацыянальнага парку Гавайскіх вулканаў. Аднак улады папярэджваюць, што непасрэдную пагрозу ўяўляе вулканічны смог, які можа дасягнуць некаторых населеных пунктаў.

Кілаўэа — адзін з самых актыўных вулканаў у свеце. Апошнім разам ён вывяргаўся ў чэрвені 2023 года.

Крыстафер Нолан экранізуе "Адысею"

Крыстафер Нолан здыме кінаадаптацыю паэмы Гамера "Адысея".

Гэта будзе "міфічны экшн", зняты з выкарыстаннем новай IMAX-тэхналогіі. Плануецца, што "Адысея" Нолана выйдзе 17 ліпеня 2026 года.

Volkswagen не закроет свои заводы, а Нолан снимет “Одиссею” — #ИхНравы

Крыстафер Нолан здымае "Адысею"

У акцёрскім складзе заяўленыя Мэт Дэйман, Том Холанд, Зендэя, Эн Хэтэуэй, Роберт Пацінсан, Лупіта Ніёнга і Шарліз Тэрон. Больш ніякіх падрабязнасцяў аб праекце не раскрываецца, але ў сетцы хадзіла шмат чутак.

"Адысея" — адзін з самых старажытных помнікаў літаратуры. Паэма пра грэцкага героя, які пасля дзесяцігадовай Траянскай вайны вяртаецца дадому, была напісаная ў VIII або VII стагоддзі да нашай эры. Аўтарства прыпісваюць Гамеру.

Volkswagen не закрые свае заводы, але моцна скароціць штат

Volkswagen сутыкаецца з праблемай лішніх вытворчых магутнасцяў і высокіх выдаткаў на персанал. Было вырашана не закрываць заводы, але скараціць штат на 35 000 чалавек. Аднак не адразу, а да 2030 года. Адначасова зменшацца і вытворчыя магутнасці.

"Узгодненае скарачэнне магутнасцяў на розных прадпрыемствах адпавядае аб'ёмам вытворчасці двух-трох вялікіх заводаў", — патлумачыў кіраўнік праўлення Volkswagen Group Олівер Блуме FAZ. Таксама рабочыя адмовіліся ад павышэння заробкаў, а чатыром тысячам менеджараў зрэжуць бонусы.

VW карэктуе і стратэгію. Цяжкасці канцэрна ў Кітаі збольшага тлумачацца тым, што на рынку расце доля электрамабіляў, а ў VW няма мадэляў эканом-класа — гэта перашкаджае павелічэнню продажаў і ў Еўропе. "З 2026 года мы выведзем на рынак чатыры мадэлі за 25 000 еўра, а ў 2027 годзе — аўтамабіль за 20 000 еўра", — заявіў Олівер Блюме.

Удзельнікам нападу на ізраільскіх заўзятараў у Амстэрдаме далі да 6 месяцаў турмы

У выніку вулічных беспарадкаў у пачатку лістапада гэтага года, калі ў Амстэрдаме праходзіў футбольны матч паміж мясцовым "Аяксам" і ізраільскім "Макабі", некалькі ізраільскіх заўзятараў атрымалі траўмы, а цяпер нападнікаў на іх прысудзілі да рэальных тэрмінаў, піша BBC.

Самы вялікі тэрмін — паўгода зняволення — атрымаў 32-гадовы Сефа О., паведамляе выданне NOS. Абвінавачанне прасіла для яго два гады турмы.

Нападнікаў прысудзілі да рэальных тэрмінаў / Vida Press nuotr

Яшчэ аднаго абвінавачанага суд прысудзіў да 10 тыдняў зняволення, двух — да аднаго месяца. Самы малодшы з абвінавачаных, 19-гадовы Лукас Д., атрымаў 100 гадзін грамадскіх работ — яго судзілі паводле ювенальных законаў.

Трох мужчын прызналі вінаватымі ў парушэнні грамадскага парадку з выкарыстаннем гвалту, двух — у распаўсюдзе інфармацыі, якая прывяла да гвалту.