Вярхоўны суд ЗША падтрымаў закон, які дазваляе забараніць TikTok

Сацыяльная сетка TikTok можа быць забароненая на тэрыторыі ЗША.

Вярхоўны суд Штатаў адхіліў апеляцыю сацсеткі, якая аспрэчвала ранейшае рашэнне пра яе забароне з меркаванняў нацыянальнай бяспекі, перадае Бі-Бі-Сі. 19 студзеня набудзе моц закон, згодна з якім кітайская кампанія Bytedance павінна ці прадаць платформу, ці апынуцца пад забаронай на тэрыторыі ЗША. У Штатах гэтай сацсеткай карыстаецца каля 170 мільёнаў чалавек.

Закон супраць TikTok у Штатах прынялі з увагі на тое, што дзейнасць сеткі знаходзіцца пад кантролем кітайскіх уладаў. Сярод іншага TikTok атрымлівае звесткі пра геалакацыю карыстальнікаў, чым можа скарыстацца Пекін.

Калі TikTok забароняць, Apple і Google больш не змогуць прапаноўваць гэты мабільны дадатак новым карыстальнікам або спампоўваць абнаўленні.

Абраны амерыканскі прэзідэнт Дональд Трамп раней сам прапаноўваў забараніць TikTok. Праўда, потым ён перадумаў і абяцаў знайсці магчымасць, каб сацсетка працягвала працаваць на тэрыторыі краіны.