Заяц вырашыў праверыць якасць цукерак па кітайскім рэцэпце на Лукашэнку

Віцэ-прэм'ер Леанід Заяц вырашыў праверыць якасць новых цукерак, вырабленых у Беларусі па кітайскім рэцэпце, на Аляксандры Лукашэнку. У чацвер ён завітаў да яго з падарункам. "Ты "на калене" пакуль вырабіў?", — ён прымаўся з насцярожанасцю.

У ліпені падчас паездкі ў Аршанскі раён Лукашэнка даручыў арганізаваць у РБ вытворчасць "папулярных у Кітаі" цукерак з прэсаванага сухога малака (іх яму прывозіў малодшы сын Мікалай) — узнікла праблема з загружанасцю складоў сыравінай. Даручэнне спешна выканалі, і Заяц паклаў на стол "ужо расфасаваны гатовы прадукт". "Вельмі прыемныя на смак", — сказаў ён.

Пробную партыю вырабілі на заводзе... медпрэпаратаў. У складзе цукерак да 40% дзіцячага харчавання, сухое цэльнае малако, сыроватка. "Так, тут вось парэчка дададзеная, — гаварыў Аляксандру Лукашэнку віцэ-прэм'ер. — Тут дададзена аскарбінавая кіслата. Дзве такія таблетачкі на кубак цёплай вады — як малако. Прыемна спажываць. Салодзенькія".

Лукашэнка заявіў, што цукеркі можна пастаўляць і ў Кітай. "Думаю, гэта пойдзе нават на Афрыку, — сур'ёзна казаў Леанід Заяц. — Фасоўку добрую зрабіць, каб пакаваць можна было ў адпаведную тару. І ўсё пойдзе". "Ну куды заўгодна — Афрыку, Кітай", — пагадзіўся з ім "дэгустатар".

Па выніках сустрэчы Заяц распавёў, што пастаўлена задача да канца 2023 года арганізаваць масавую вытворчасць "беларускіх цукерак па кітайскім рэцэпце" — і для беларусаў, і для замежнікаў.