ЗША не адмаўляюцца ад патрабавання аб рэабілітацыі былых беларускіх палітвязняў
ЗША не адмаўляюцца ад патрабавання аб рэабілітацыі былых беларускіх палітвязняў. Пагаршэнне сітуацыі з правамі чалавека прывядзе да аднаўлення дзеяння санкцый ЗША ў дачыненні да Беларусі. Пра гэта падчас сустрэчы з журналістамі паведамілі прадстаўнікі Дзярждэпартаменту ЗША — намеснік памочніка дзяржсакратара па пытаннях Еўропы і Еўразіі Брыджэт Брынк і намеснік памочніка дзяржсакратара па пытаннях дэмакратыі, правоў чалавека і працы Роберт Бяршынскі.
“Беларускія ўлады зрабілі вельмі пазітыўны крок, вызваліўшы ў жніўні гэтага года 6 палітычных зняволеных. У адказ на гэтую меру ЗША таксама адказалі пазітыўным крокам (прыпыненне дзейнасці санкцый супраць шэрагу беларускіх прадпрыемстваў — Еўрарадыё), але наша стаўленне не змянілася і мы будзем працягваць настойваць на поўнай рэабілітацыі палітычных зняволеных у іх правах”, — адказваючы на пытанне Еўрарадыё заявіў Роберт Бяршынскі.
Па яго словах, ЗША гатовыя да далейшых крокаў у паляпшэнні адносінаў з Беларуссю, але калі сітуацыя з правамі чалавека і дэмакратыяй у нашай краіне будзе пагаршацца, то “заўжды застаецца магчымасць адыграць прынятае рашэнне і ўвесці санкцыі ў поўную сілу”.
Як дадае Брыджэт Брынк, рашэнне аб прыпыненні дзейнасці санкцый ЗША прымалі ў каардынацыі з Еўрасаюзам. Рашэнне гэтае арыентаванае на будучае і скіраванае на падтрымку беларускай эканомікі.
Нагадаем, эканамічныя санкцыі ЗША былі ўведзеныя пасля выбараў 2006 года і закранулі такія беларускія прадпрыемствы, як “Беларусьнафта”, “Белнафтахім” і яе філіял у ЗША Belneftekhim USA, “Гродна-Азот”, “Гродна-Хімвалакно”, ААТ “Нафтан” і “Полацк-Шкловалакно”. Адзначым, што прыпыненнем дзеяння санкцый прадпрыемствам дазволеныя толькі пэўныя трансакцыі, але ўласнасць кампаній застаецца заблакаванай. Цалкам санкцыі могуць быць знятыя 30 красавіка 2016 года.
Фота прадастаўленае амбасадай ЗША ў Мінску.
