ЗША патрабуюць неадкладнага вызвалення Рамана Пратасевіча

ЗША патрабуюць неадкладнага вызвалення Рамана Пратасевіча, заявіў дзяржсакратар краіны Энтані Блінкен.

Па яго словах, "Злучаныя Штаты рашуча асуджаюць прымусовае змяненне напрамку палёту паміж двума краінамі-членамі ЕС і наступны арышт журналіста Рамана Пратасевича ў Мінску".

Тое, што адбылося з бортам Ryanair на тэрыторыі Беларусі дзяржсакратар ЗША назваў "шакавальным актам". Па яго словах, дзеянні беларускіх уладаў паставілі пад пагрозу жыцці больш за 120 пасажыраў, у тым ліку грамадзян ЗША.

"Першапачатковыя паведамленні аб дачыненні беларускіх службаў бяспекі і выкарыстанні беларускіх вайсковых самалётаў для суправаджэння борта выклікаюць сур'ёзную занепакоенасць і патрабуюць поўнага расследавання", — адзначыў Блінкен.

Ён таксама паведаміў, што Вашынгтон каардынуе сваю рэакцыю з партнёрамі ў ЕС. ЗША таксама выступілі за больш хуткае пасяджэнне Рады Міжнароднай арганізацыі грамадзянскай авіяцыі, дзе быў бы разгледжаны гэты інцыдэнт.

У нядзелю ў Мінску здзейсніў вымушаную пасадку самалёт кампаніі Ryanair, які ляцеў з Афін у Вільню. Для суправаджэння борта ў мінскі аэрапорт беларускія вайскоўцы выкарыстоўвалі знішчальнік. Прычынай такіх дзеянняў назвалі паведамленне аб мініраванні самалёта. Выбуховага прыстасавання на борце не знайшлі. Але быў затрыманы адзін з пасажыраў — журналіст Раман Пратасевіч, у дачыненні да якога ў Мінску распачата крымінальная справа па некалькіх артыкулах.