ЗША зноў заклікалі Мінск пачаць дыялог з народам
Прэс-сакратар Дзярждэпартамента ЗША Нед Прайс/ Reuters
Пачаць інклюзіўны дыялог з народам і вызваліць усіх незаконна затрыманых заклікаў афіцыйны Мінск прэс-сакратар Дзяржаўнага дэпартамента ЗША Нед Прайс.
"Мы падтрымліваем беларускі народ, які патрабуе сваіх правоў для краіны і будучыні", — сказаў Прайс. Ён таксама адзначыў, што ў ЗША ўражаныя выключнай стойкасцю і мужнасцю беларускага народа.
"Нягледзячы на бесперапынныя рэпрэсіі, ён (народ — Еўрарадыё) працягвае патрабаваць свабоды і дэмакратыі", — адзначыў прадстаўнік Дзярждэпартамента.
Па словах Прайса, ЗША і ў далейшым будуць салідарныя з беларусамі і ўсімі тымі, хто "сутыкаецца з жудаснай жорсткасцю пры рэалізацыі сваіх дэмакратычных свабодаў".
We urge the Belarusian authorities to begin inclusive dialogue with the Belarusian people in a credible manner and to release all those unjustly detained and wrongfully imprisoned. We stand with the Belarusian people as they demand their rights for their country and their future. pic.twitter.com/8TLr3uxrcB
— Ned Price (@StateDeptSpox) February 11, 2021
Раней, 11 лютага, амбасада ЗША ў Беларусі выступіла з заявай з нагоды Усебеларускага народнага сходу, які ў гэтыя дні праходзіць у Мінску.
На думку амерыканскіх дыпламатаў, гэты форум ніяк не дапамагае вырашыць палітычны крызіс у Беларусі. Лідары і актывісты пратэстнага руху па-ранейшаму ў турме або вымушаныя былі з'ехаць за мяжу. Іх меркаванне ніяк не прадстаўлена на сходзе. Між тым, "палітычныя зняволеныя, тыя, хто знаходзяцца ў выгнанні, а таксама каля 30 000 чалавек, якія прайшлі праз арышты са жніўня 2020 года, заслугоўваюць права голасу ў вызначэнні будучыні сваёй краіны", перакананыя дыпламаты.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
