Зварот гісторыкаў і актывістаў з нагоды ўгодкаў Слуцкага збройнага чыну

З нагоды ўгодкаў Слуцкага збройнага чыну (альбо Дня герояў), які неафіцыйна адзначаецца ў Беларусі, з'явіўся зварот беларускіх гісторыкаў і грамадскіх дзеячоў.

"Яны змагаліся за свабоду сваю і Айчыны! Яны не чакалі ні ад каго дапамогі! Яны самыя вырашалі свой лёс! Яны паклалі свае жыцці за Беларусь, за нас, за цябе!

Дзевяноста чатыры гады таму, 27 лістапада 1920 года, распачаўся Слуцкі збройны чын. Нашы продкі выступілі на змаганне за сваю дзяржаву – Беларускую Народную Рэспубліку. У бой рушылі Слуцкі і Грозаўскі палкі Першай Слуцкай брыгады стралкоў БНР. Да іх далучыліся беларускія часткі арміі генерала Станіслава Булак-Балаховіча, якія раней біліся пад Мазыром — Беластоцкі батальён і Смаленскі полк, а таксама партызанскія атрады "Зялёнага Дуба".

Некалькі тысяч паўстанцаў на працягу месяца давалі адпор бальшавіцкай навале. Апошнія атрады сышлі з поля бітвы толькі ў студзені 1921 года. Партызанскія атрады прадаўжалі змаганне яшчэ некалькі гадоў.

Свая Рэспубліка нараджалася ў крывавых муках, але наш беларускі родны дух, які тады ажыў, не згасаў. На поле бітвы ў след за случчакамі выходзілі наступныя пакаленні змагароў за Беларусь.

27 лістапада — іхны дзень: Дзень Герояў. Таму заклікаем усіх, хто носіць імя беларуса, годна святкаваць гэты Дзень, успамінаць нашых Герояў і штогод ставіць у акне свечку. Няхай яе агенчык сігналіць Змагарам, што ў гэтай хаце помняць іх Чын.

Жыве Беларусь!

Алесь Краўцэвіч, Беларускае Гістарычнае Таварыства

Алег Латышонак, Беларускае Гістарычнае Таварыства ў Польшчы

Анатоль Міхнавец, Беларуская Нацыянальная Памяць".