Звольнены начальнік "вучэбкі" ў Печах, дзе служыў загінулы салдат

Раней Мінабароны паведамляла, што ад пасад былі адхіленыя пяць службовых асобаў, а яшчэ чацвёра вайскоўцаў — звольненыя з Узброеных Сілаў.

Следчы камітэт, у сваю чаргу, паведаміў пра затрыманне сямі сяржантаў, старшыны роты і двух афіцэраў. Сяржантаў падазраюць у нестатутных адносінах, афіцэраў — у тым, што ведалі і бяздзейнічалі. 

"Праверка працягваецца. Абавязкова будзе забяспечана не толькі няўхільнасць пакарання ў адпаведнасці з заканадаўствам вінаватых асоб за здзяйсненне правапарушэнняў, але і службовых асоб — за непрыняцце мер па падтрыманні дысцыпліны", — запэўнівае Мінабароны.

Скандал вакол смерці салдата тэрміновай службы Аляксандра Коржыча цягнецца другі тыдзень. Дагэтуль Мінабароны заяўляла толькі пра кампанію па дыскрэдытацыі Узброеных Сілаў.