З'явілася відэа з затрыманым Ягорам Лебядком
З'явілася відэа з затрыманым беларускім ваенным экспертам Ягорам Лебядком. На ім ён кажа, што затрыманы супрацоўнікамі міліцыі. На відэа Лебядок добра трымаецца, яно зусім не "пакаяльнае".
"З'яўляюся ваенна-палітычным аглядальнікам, вяду свой канал, які асвятляе пытанні ваеннай бяспекі, — кажа Ягор Лебядок. — Даю інтэрв'ю каналам, якія прызнаныя ў нас "экстрэмісцкімі" на тэму вайны ва Украіне, ну і на іншыя пытанні. У жніўні 2020 года наведваў недазволеныя заканадаўствам масавыя мерапрыемствы, размясціў у сябе на старонцы ў Facebook плакат фашысцкай Германіі... У цяперашні момант затрыманы супрацоўнікамі міліцыі".
Лебядок — навуковец-фізік, кандыдат фізіка-матэматычных навук. Але ў апошнія год-паўтара ён стаў вядомы як ваенны эксперт, неаднаразова выступаў у эфіры Еўрарадыё. У пачатку 2022-га яго звольнілі з пасады загадчыка лабараторыі. У Ягора Лебядка ёсць тэлеграм-канал, прысвечаны вайсковай і інфармацыйнай бяспецы Беларусі.
Пра затрыманне Лебядка стала вядома 13 ліпеня. Ён знаходзіцца на Акрэсціна.
