137 кіроўцаў паўторна затрымана ў Беларусі за язду ў нецвярозым стане

Нагадаем, у сераду ў аднаго такога парушальніка мінскі суд канфіскаваў аўтамабіль "Фіят". Гэта першы такі выпадак пасля таго, як набыў моц закон аб канфіскацыі аўто ў нецвярозых кіроўцаў.

Мінскія ДАІшнікі накіравалі ў Следчы камітэт адпаведныя дакументы на яшчэ 10 “паўторнікаў”. Гэта рэальныя кандыдаты на канфіскацыю аўтамабіляў. Але ў сталічным ДАІ не выключаюць, што пасля аналізу статыстыкі затрыманняў нецвярозых кіроўцаў цягам года іх колькасць павялічыцца.  
 

Змены ў беларускім заканадаўстве, паводле якіх за паўторнае на працягу года кіраванне ў нецвярозым выглядзе кіроўцы могуць пазбавіцца аўтамабіля, ўступілі ў сілу 24 кастрычніка. Прайшло тры тыдні, але ДАІ ўжо адзначае, што п'яных за рулём стала менш. Так, раней за суткі па краіне ў сярэднім затрымлівалася каля 100 такіх парушальнікаў. У апошнія дні гэтая лічба скарацілася да 60-70 чалавек, паведамляе БЕЛТА.

Фота — sb.by