"Абавязкова настане час і вольнай Беларусі, Беларусі ў Еўропе" — Зяленскі

У Берліне на Міжнароднай канферэнцыі па аднаўленні Украіны ўкраінскі прэзідэнт Уладзімір Зяленскі ў чарговы раз выказаўся пра будучыню Беларусі. "Абавязкова настане час і вольнай Беларусі, Беларусі ў Еўропе", — сказаў ён.

Зяленскі выступіў на адкрыцці канферэнцыі. Ён згадаў нашу краіну, калі гаварыў пра будучыню Украіны і яе суседзяў. "Еўрасаюз патрэбен усім еўрапейцам без выключэння і кожнай нацыі, якая падзяляе агульныя каштоўнасці ўсёй Еўропы і хоча жыць, як і мы, у міры", — адзначыў украінскі прэзідэнт.

Дарэчы, кіраўніца Еўракамісіі Урсула фон дэр Ляен заявіла, што да канца чэрвеня пачнуцца перамовы аб уступленні Украіны ў ЕС.

Раней Уладзімір Зяленскі неаднаразова выказваўся пра будучыню Беларусі. У траўні ён сказаў, што РБ павінна стаць часткай Еўрасаюза. У пачатку года ў Вільні Зяленскі згадаў "дзень новага шанцу для Беларусі".