Афіцыйны Мінск не выдаў візу кіраўніку прадстаўніцтва ЕС Дзірку Шубелю
Дзірк Шубель / DW
Беларускія ўлады адмовіліся выдаць візу кіраўніку прадстаўніцтва ЕС Дзірку Шубелю.
Цяпер дыпламат не можа вярнуцца ў Беларусь. Хутчэй за ўсё ён страціць статус амбасадара Еўрасаюза ў Беларусі, бо без візы гэта немагчыма.
Прэс-сакратар Еўракамісіі Петэр Стана ў каментары "Белсату" назваў дзеянні афіцыйнага Мінска недружалюбным крокам, які яшчэ больш абмяжуе дыпламатычныя кантакты і двухбаковыя адносіны паміж ЕС і Беларуссю.
"Для нас вельмі важна, каб у нас былі людзі, акрэдытаваныя на месцах, і нашыя амбасадары маглі працаваць без абмежаванняў, штучных абмежаванняў", — дадаў Стана.
Ён прыгадаў нядаўняе затрыманне ў Мінску часовай паверанай ЕС у Беларусі Эвеліны Шульц і паставіў гэты інцыдэнт у адзін шэраг з адмовай у візе Дзірку Шубелю.
