Акумулятарны завод пад Брэстам яшчэ не пачаў працу
Акумулятарны завод пад Брэстам планавалі запусціць напрыканцы студзеня 2021 года, аднак пакуль што пра афіцыйнае адкрыццё пакуль нічога не чуваць.
Арыенціровачныя тэрміны ўводу акумулятарнага завода ў эксплуатацыю назваў амаль чатыры месяцы таму дырэктар "Акумулятарнага Альянсу" Дзмітрый Бутаў на сустрэчы з гараджанамі. Па першапачатковых планах, прыёмачная камісія мусіла завяршыць сваю працу напрыканцы студзеня.
Аднак цяпер журналістам TUT.by сказалі ў прэс-службе "Акумулятарнага Альянса", што спецыялісты ўсё яшчэ працуюць: "Тэрмін працы вызначаны да пачатку лютага".
Тым часам пра мясцовы рэферэндум наконт лёсу завода нічога не чуваць. Правядзенне такога рэферэндуму абяцаў Аляксандр Лукашэнка падчас сустрэчы з брастаўчанамі ўлетку 2020 года. Пасля гэтага ўлады правялі некалькі сустрэч з праціўнікамі будаўніцтва. Апошняя з іх адбылася 12 кастрычніка з намеснікам старшыні Брэсцкага аблвыканкама Генадзем Барысюком. Ён заявіў, што для рэферэндуму жыхары Брэста і Брэсцкага раёна павінныя стварыць ініцыятыўную групу і падаць адпаведную заяву.
Праваабаронца Раман Кісляк кажа, што стварыць ініцыятыўную групу прашкаджае пандэмія каранавіруса. "Праводзіць сходы і збіраць подпісы ў такіх умовах практычна немагчыма. Мы разлічваем пасля паляпшэння эпідэміялагічнай сітуацыі правесці сход ініцыятыўнай групы па правядзенні мясцовага рэферэндуму і адправіць у Тэльмінскі сельскі савет дакументы на яе рэгістрацыю. Калі ініцыятыўную групу зарэгіструюць, зможам прыступіць да збору подпісаў для таго, каб ініцыяваць правядзенне мясцовага рэферэндуму", — кажа праваабаронца.
Брастаўчане два гады змагаліся супраць экалагічна шкоднага завода, які пабудавалі на ўскрайку горада. Урэшце абласныя ўлады спынілі будаўніцтва, а кіраўніцтва фірмы "АйПаўэр" было затрыманае супрацоўнікамі КДБ. Але пасля таго, як адным з новых гаспадароў стаў экс-хакеіст Дзмітрый Баскаў, набліжаны да Лукашэнкі, будаўніцтва завода аднавілася.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
