Аншлаг ў Інстытуце псіхалогіі і конкурс у МУС. Што там з прыёмам на бюджэт?

19/07/2024 - 15:59

Куды паступаюць беларусы?

Калі ў "педагагічны" — то толькі на "псіхалогію", а ў "мед" — каб стаць дарагім стаматолагам дзе-небудзь за мяжой. Быць журналістам — не камільфо. Настаўнікам?.. Толькі не ў нашай краіне. Горкі? Не, не чулі…

Беларускія ВНУ завяршылі прыём дакументаў ад абітурыентаў, якія плануюць вучыцца на бюджэце. Па традыцыі Еўрарадыё паглядзела, як ідуць справы ў некаторых універсітэтах і якія там трэнды.

Дзяўчынкі і хлопчыкі, якія хочуць стаць міліцыянтамі

Сёлета на бюджэтную дзённую форму навучання ў Акадэмію МУС Беларусі плануюць набраць 438 абітурыентаў. І калі на "Правазнаўства" факультэта міліцыі і грамадскай бяспекі плануецца прыняць 115 чалавек, а заявы падалі 100, то на такую ж спецыяльнасць факультэта крымінальнай міліцыі — 279 ахвотнікаў на 82 месцы (для параўнання ў мінулым годзе конкурс складаў прыкладна 2,5 ч/м).

Яшчэ адзін цікавы момант: на бюджэт у Акадэмію МУС прымаюць толькі 10 дзяўчат. Іх чакаюць на крымінальна-выканаўчым факультэце (спецыяльнасць — "Правазнаўства"). Пры гэтым прынята 35 заяў. Без экзамену пройдуць 3 абітурыенткі, па-за конкурсам — 4. На што разлічваюць тыя, што засталіся?

Сёлета на 20 месцаў жаночага набору па спецыяльнасці "Прававое забеспячэнне грамадскай бяспекі" не самага папулярнага Магілёўскага інстытута МУС падалі заявы 80 абітурыентак. Год таму пры такім жа наборы атрымаць спецыяльнасць марылі 75 дзяўчат.

Што там у БДУ?

Сёлета "Міжнародныя права", "Міжнародныя адносіны", "Эканамічная інфарматыка", "Правазнаўства", "Фундаментальная і прыкладная біятэхналогія" сталі аднымі з самых папулярных кірункаў у БДУ.

На спецыяльнасць "Міжнароднае права" факультэта міжнародных адносін плануецца залічыць 10 чалавек. Пры гэтым заявы падалі 25 абітурыентаў.

На спецыяльнасць "Эканамічная інфарматыка" эканомфака плануецца набраць 14 чалавек. 43 абітурыенты мараць стаць аднымі з іх.

На бюджэт ваеннага факультэта "Правазнаўства" па профілі "Юрысконсульцкая праца ў ваеннай сферы" плануецца набраць 14 абітурыентаў і 3-х абітурыентак. Пры гэтым усяго заяў падалі 18 хлопцаў і 6 дзяўчат.

Самая папулярная спецыяльнасць на біялагічным факультэце — "Фундаментальная і прыкладная біятэхналогія". Сюды плануецца набраць 50 чалавек пры 88 жадаючых.

На філалагічным факультэце па агульным конкурсе плануецца набраць 105 бюджэтнікаў, усяго падалі заявы 131 чалавек. Пры гэтым спецыяльнасцю "Беларуская філалогія" зацікавіліся 24 абітурыенты пры плане прыёму 21.

Сёлета "конкурс" на факультэце журналістыкі БДУ складае менш за 1,1 чалавека на месца. Па спецыяльнасці "Журналістыка" — 1,07 ч/м (79 заявак на 74 месцы + 6 абітурыентаў па-за конкурсам). Па спецыяльнасці "інфармацыя і камунікацыя" — 1,05 ч/м (44 заяўкі на 42 месцы).

На тэалагічны факультэт плануецца залічыць 25 чалавек, усяго падалі заяўкі 34 абітурыенты. Летась сюды на 25 месцаў прэтэндаваў 31 абітурыент.

А на 118 месцаў на гістарычным факультэце па агульным конкурсе прэтэндуюць 130 абітурыентаў (летась на 50 месцаў было пададзена 69 заяў).

Айцішнікаў становіцца менш

Атрымаць дыплом медыка або айцішніка і з'ехаць за мяжу — шматгадовая тактыка беларусаў. Гэты год таксама не стаў выключэннем.

Высокі конкурс і вельмі высокі прахадны бал — на стаматалагічным факультэце БДМУ. Сюды падалі дакументы 68 абітурыентаў пры плане прыёму 40 чалавек на ўмовах агульнага конкурсу. 23 абітурыенты пры гэтым набралі ад 396 да 400 балаў, і яшчэ 17 чалавек — ад 391 да 395. Атрымліваецца, што прахадны бал на гэты факультэт — не менш за 390.

Што тычыцца IT, калі глядзець на колькасць пададзеных заяў — цікавасць вучыцца на бюджэце ў БДУІР у абітурыентаў прыкметна згасла. Колькасць жадаючых — мінімальная за апошнія тры гады.

На 1190 бюджэтных месцаў падалі ўсяго 1415 заяў. Для параўнання ў 2023 годзе заявы падалі 1577 абітурыентаў, а ў 2022-м — 1460.

Тым не менш, традыцыйна шмат заяў падалі на спецыяльнасць "Праграмная інжынерыя" — 269 пры плане прыёму 46 (+9 па мэтавым наборы). Пры гэтым 27 абітурыентаў ішлі без здачы ўступных іспытаў, яшчэ адзін падаваўся па-за конкурсам.

Недабор настаўнікаў малодшых класаў

У нейкі момант некаторыя абітурыенты зарыентаваліся, чым можна зарабляць на жыццё ў наш няпросты час і пайшлі падаваць заявы ў БДПУ.

Быць настаўнікамі ў малодшых класах яны не збіраюцца (на факультэце пачатковай адукацыі недабор: на 125 бюджэтных месцаў прэтэндуе ўсяго 73 чалавекі). На філалагічны факультэт па спецыяльнасці "Беларуская мова і літаратура" падалі ўсяго 4 заявы пры плане прыёму — 10.

Аншлаг — у Інстытуце псіхалогіі БДПУ! 123 ахвотнікі змагаюцца за 75 прапанаваных бюджэтных месцаў.

Залегчы на дно ў Горках

Альма-матэр Лукашэнкі зноў у аўтсайдарах. Сельскагаспадарчай акадэміі ў Горках не дапамагаюць ні выпускнікі "аграрных класаў", ні больш працяглы ў параўнанні з іншымі ВНУ набор.

Так на 304 бюджэтных месцаў агратэхналагічнага і біятэхналагічнага факультэтаў падалі дакументы ўсяго 119 абітурыентаў. Аналагічная сітуацыя назіраецца і на некалькіх іншых факультэтах.