Апалчэнцам у Беларусі дазволяць праводзіць затрыманні і ўжываць зброю

Стала вядома, якімі правамі плануецца надзяліць прадстаўнікоў апалчэння. Праект закона "Аб народным апалчэнні" апублікаваны ў банку даных законапраектаў на Нацыянальным прававым інтэрнэт-партале. У Палату прадстаўнікоў ён унесены Саветам міністраў.

Асноўнай задачай апалчэння называецца садзейнічанне мясцовай міліцыі пры забеспячэнні ваеннага становішча, абароне ўласнасці ад злачынных ды іншых супрацьпраўных замахаў.

Добраахвотнікі ў атрадах апалчэння атрымаюць наступныя правы:

ужываць фізічную сілу, выкарыстоўваць зброю;

праводзіць затрыманне асоб, якія ўчынілі злачынства або адміністрацыйнае правапарушэнне, для перадачы міліцыі;

дапамагаць тэрытарыяльным органам унутраных спраў, у тым ліку пры затрыманні і даглядзе транспартных сродкаў, праверцы дакументаў, аглядзе памяшканняў.

Пра стварэнне "народнага апалчэння" беларускія ўлады загаварылі ў 2022 годзе. Агучваліся амбіцыйныя планы пра колькасць у 100-150 тысяч чалавек. Праўда, дагэтуль створаныя толькі некалькі такіх атрадаў "у парадку эксперыменту". Пры гэтым у Мінабароны кажуць, што самастойна запісацца ў апалчэнцы пакуль што нельга — няма адпаведнага закона.