Азаранка не выйшла ў фінал тэніснага турніру ў Маямі (відэа)

Вікторыя Азаранка не выйшла ў фінал тэніснага турніру ў Маямі. У паўфінале беларускую тэнісістку ў трох сэтах абыграла больш рэйтынгавая амерыканка Слоан Стывенс — 3:6, 6:2, 6:1. Пералом адбыўся ў другім сэце. Вікторыя выйгравала з лікам 2:0, аднак, відаць, яе пачалі пакідаць сілы, пайшлі двайныя памылкі, дадаўся боль у назе — усе наступныя 6 геймаў выйграла Стывенс. У трэцім сэце амерыканка ўпэўнена давяла паядынак да перамогі.

Раней на турніры ў Маямі Вікторыя Азаранка паслядоўна абыграла амерыканак Кэтрын Бэліс і Мэдысан Кіз, Анастасію Севаставу з Латвіі, чэшку Караліну Плішкаву (6-ю ракетку свету). Вікторыя з лета мінулага года, з-за суда ў ЗША па справе аб апецы над сынам, не выступала і толькі нядаўна вярнулася на корт.