Падзеі ў Кіеве ў панядзелак, 9 снежня (онлайн, фота, відэа)

23.41. Клічко-малодшы спыніў трактар, які ехаў на барыкады (фота)


 

22.41. Віцэ-прэзідэнт ЗША заклікаў Януковіча пачаць дыялог з апазіцыяй.
 

21.49. Мапа блакады Еўрамайдана ў Кіеве.
 

21.20. Як перадае ЛІГАБізнесІнформ, у выніку кардон супрацоўнікаў праваахоўных органаў апынуўся ў ачапленні мітынгоўцаў.

Нагадаем, пад вечар 9 снежня байцы Ўнутраных войскаў пачалі адціскаць блокпасты пратэстоўцаў ва ўрадавым квартале на вуліцы Лютэранскай, Шаўкавічнай, Грушэўскага і ў Крапасным завулку каля Кабміна.

***

20.56. Партыя "Удар" эвакуявала сваіх супрацоўнікаў з офіса партыі.

Пра гэта паведамляе УНІАН са спасылкай на прэс-службу апазіцыйнай партыі. У прэс-службе заўважылі, што эвакуацыя звязаная з пагрозай захопу памяшкання партыі. Раней з'явілася паведамленне, што ўзброеныя аўтаматамі сілавікамі захапіў офіс партыі "Бацькаўшчына". З офіса былі вынесеныя серверы.

***

20.47. МУС паведаміла, хто і чаму штурмаваў офіс "Бацькаўшчыны". Паводле афіцыйнага тлумачэння, ператрус на вуліцы Тураўскай, 19-Б, дзе размяшчаецца офіс партыі "Бацькаўшчына", адбыўся па санкцыі суда.

Паведамляецца, што ператрус адбыўся ў ў рамках расследавання крымінальнай справы, адкрытай па двух артыкулах Крымінальнага кодэкса Украіны. Яны прадугледжваюць адказнасць за махлярства і злоўжыванне службовым становішчам.

У афіцыйным паведамленні МУС гаворыцца, што да іх паступіў зварот групы грамадзян. Яны сцвярджалі, што службовыя асобы адной з камерцыйных структур падманным шляхам завалодалі маёмасцю, якая належыць заяўнікам, гаворка ішла пра камп'ютарную тэхніку на суму больш 350 тысяч грывен. Акрамя таго, у заяве ішла гаворка пра злоўжыванні службовым становішчам з боку службовых асоб гэтай камерцыйнай структуры. Пра гэта на сваёй старонцы ў фэйсбуку паведаміў галоўны рэдактар ""Коммерсантъ-Украина" Валерый Калныш.

У рамках дасудовага расследавання, на падставе рашэння суда міліцыянты і  правялі ператрус у памяшканні згаданай камерцыйнай структуры па адрасе: Кіеў, вуліца Тураўская, 19-Б. Падчас ператрусу забралі камп'ютарную тэхніку і дакументы прадпрыемства, якія маюць даказальнае значэнне ў крымінальнай вытворчасці.

Дасудовае расследаванне працягваецца.
 

***

20.25. Кіеўскія выратавальнікі патлумачылі, навошта вывелі ў цэнтр горада пажарныя машыны. Па іх словах, гэта неабходна для дапамогі па выцягванні аўтамабіляў са снежных засносаў.

Як паведамляе УНІАН, агулам па Кіеве засяроджана больш за 20 адзінак спецтэхнікі, уключаючы пажарную для аказання такой дапамогі. Пэўная частка спецыяльнай пажарнай тэхнікі запраўленая вадой на выпадак пажару. На пытанне, ці можа такая тэхніка быць скарыстаная супраць удзельнікаў акцый пратэсту ў цэнтры Кіева як вадамёты, у прэс-службе выратавальнікаў адказалі катэгарычным "не".

***

20.15. "Беркут" захапіў офісы апазіцыйных СМІ

Байцы спецпадраздзялення захапілі офіс апазіцыйнага тэлеканала INTV. Да офіса тэлекампаніі не падпускаюць аўтамабілі.

Сілавікі таксама занялі рэдакцыю газеты "Вечерние вести" і сайта Цензор.net, якая знаходзіцца ў тым жа будынку. Журналісты адзначаюць, што "сілавікі разбураюць усё на сваім шляху, уключаючы тэхніку".

***

19.56 Праваахоўнікі адціскаюць мітынгоўцаў ад Адміністрацыі прэзідэнта на вуліцы Лютэранскай.

Як перадае УНІАН, адначасова з гэтым бульдозер пачаў руйнаваць ахоўныя збудаванні. Ён пагрузіў на грузавік біяпрыбіральні, якія былі выстаўлены кардонам перад намётавым лагерам. Каля барыкад, усталяваных учора, знаходзіцца прыкладна 50 чалавек. Яны выкрыкваюць "Банду гець!" і кідаюць снежкамі ў праваахоўнікаў, якія пераразаюць металічныя правады, якімі была замацаваная барыкада.

***

19.45. СМІ: У офісе "Бацькаўшчыны" — супрацоўнікі СБУ. МУС абвяргае, што яго супрацоўнікі занялі офіс апазіцыйнай партыі.

Пра гэта паведамляе "Украинская правда" са спасылкай на "Інтэрфакс-Украіна". Па звестках журналістаў, у офісе апазіцыйнай партыі знаходзяцца супрацоўнікі Службы бяспекі Украіны.

Раней дэпутат ад "Бацькаўшчыны" Руслан Лук'янчук паведаміў, што некаторыя супрацоўнікі паспелі выскачыць з офіса. Паведамлялася, што офіс захапілі "беркутаўцы", узброеныя аўтаматамі. Пад'езды да будынка перакрылі пасты ДАІ.

Відавочцы паведамляюць, што "Беркут" зайшоў у серверны пакой. Відавочцы паведамілі "Украинской правде", што на ўваходзе ў офіс стаяць тры "беркутаўцы".

***

19.26. Камунальнікі разабралі барыкады каля Кабміна. Супрацоўнікі камунальных службаў пры падтрымцы праваахоўнікаў разабралі барыкады на вуліцы Грушэўскага.

Як перадае УНІАН, месца шчыльна атачылі байцы "Беркута" і ўнутраных войскаў. Яны сталі ў тры шэрагі ў колькасці больш за 100 чалавек у поўнай экіпіроўцы са шчытамі. Другая частка стварыла яшчэ адзін кардон трохі далей.

Цяпер да расчышчаных завалаў спрабуюць пад'ехаць два грузавікі, каб прыбраць рэшткі барыкады. Недалёка ад стадыёна імя Лабаноўскага стаяць каля 200 актывістаў, якія спрабуюць прабіцца праз кардон міліцыі. З варот Дома ўрада выехалі два трактары для ўборкі смецця. Паміж актывістамі і міліцыяй ўзнікла сутычка.

***

19.17 Віталь Клічко заклікаў "Беркут" не выконваць злачынных загадаў. Лідар партыі "Удар" заклікаў супрацоўнікаў "Беркута" і ўнутраных войскаў не ўжываць сілу супраць мірных людзей, якія стаяць з пікетамі.

Пра гэта УНІАН паведамілі ў прэс-службе "Удара". Клічко звярнуўся да сілавікоў з наступнымі словамі: "Тут стаяць людзі без зброі. Тут няма правакатараў і баевікоў. Таму я заклікаю вас у любым выпадку не ўжываць зброю і спецсродкі. Я жадаю, каб вы не ішлі ўразрэз са сваімі прынцыпамі, з уласным абавязкам абараняць людзей. Не выконвайце злачынных загадаў. Што б вам ні казалі, усё адно за гэта давядзецца адказваць".

***

19.00. У гэтыя хвіліны ўзброеныя аўтаматамі міліцыя і байцы "Беркута" штурмуюць офіс партыі "Бацькаўшчына". Пра гэта паведамляе УНІАН са спасылкай на прэс-службу партыі.

Іншыя ўкраінскія СМІ паведамляюць, што сілы ўнутраных войскаў на вуліцы Банкавай атачылі намётавы гарадок і ўсталявалі кардон на вуліцы Лютэранскай. Цяпер там ідзе мітынг. Пратэстоўцы ў касках выбудавалі некалькі кардонаў жывога ланцуга насупраць праваахоўнікаў. Таксама жывы ланцуг удзельнікі Майдана паставілі на выездах з двароў.

Людзей, якія засталіся ў лагеры, і журналістаў, па інфармацыі відавочцаў, унутраныя войскі не выпускаюць з гэтага ачаплення. У дварах на вуліцы Лютэранскай таксама знаходзяцца сілы МУС, у тым ліку "Беркута".

На ўсіх пікетах знаходзяцца народныя дэпутаты Украіны.

Фота — Еўрарадыё, УНІАН