"Беларусь ён пакінуў не на верталёце": адвакат распавёў пра ад'езд Шклярава

27 кастрычніка ўвечары адвакат Віталя Шклярава распавёў Еўрарадыё пра яго ад'езд. Паводле слоў Антона Гашынскага, Беларусь паліттэхнолаг пакінуў не на верталёце. Куды адправіўся Шкляраў, адвакат не гаворыць.  

— У Беларусі яго ўжо няма. Мы звярнуліся з хадайніцтвам на імя следчага з просьбай дазволіць выезд Віталя за мяжу па сямейных абставінах — для таго, каб убачыцца з сям'ёй, з сынам і паправіць сваё здароўе. Маму Віталя шпіталізавалі з-за яе стану, яна зараз у бальніцы, і Віталь асабліва тут не патрэбны. Таму ён звярнуўся з такім хадайніцтвам, хадайніцтва было задаволенае, і яго адпусцілі з абавязацельствам вярнуцца па першым патрабаванні. Беларусь ён пакінуў не на верталёце, — каментуе Гашынскі ад'езд падабароннага. 

Беларускія ўлады падазравалі Шклярава ў тым, што ён дапамагаў Сяргею Ціханоўскаму ў пачатку прэзідэнцкай гонкі. Спецыяліст мае амерыканскі пашпарт. 

Мужчына быў вызвалены з-пад зняволення пасля сустрэчы з Аляксандрам Лукашэнкам у СІЗА КДБ. Яго лёс з Лукашэнкам абмяркоўваў па тэлефоне дзяржсакратар ЗША Майк Пампеа.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.