“Белая Русь”: прэзідэнцкія выбары стануць для нас момантам ісціны

Паводле Радзькова, аб’яднанне пакуль не будзе станавіцца партыяй. Яго дзейнасць скіраваная на кансалідацыю грамадзянскай супольнасці.

“Адзін з момантаў гэтай кансалідацыі — будучыя прэзідэнцкія выбары. Яны стануць для нас момантам ісціны”, — падкрэсліў ён.

Радзькоў адзначыў, што развіццё грамадзянскай супольнасці з’яўляецца “адной з умоваў устойлівага развіцця незалежнай Беларусі”. Паводле яго словаў, “усведамленне гэтага разгарнула арганізацыю”, у якую цяпер уваходзіць каля 150 тысяч чалавек.

“Белая Русь” мяркуе ўдзельнічаць у прэзідэнцкіх выбарах праз “маніторынг насельніцтва”. Людзям маюць распавесці, “што для іх станоўчага зрабіла дзяржава”. Дзеля гэтага асабіста Аляксандр Радзькоў гатовы выкарыстаць досвед працы ў камандзе дзеючага кіраўніка дзяржавы, атрыманы на мінулых выбарах у 2010 годзе.

15 лістапада ў Мінску праходзіць пашыранае паседжанне рэспубліканскай рады РГА “Белая Русь”, у якім бярэ ўдзел каля 400 чалавек, паведамляе БелаПАН.