Брастаўчанін расплаціўся пісталетам-кулямётам за паездку ў таксоўцы
Жыхар Брэста за паездку ў таксоўцы расплаціўся сувенірным пісталетам-кулямётам. Пра гэта агенцтву БЕЛТА распавяла афіцыйная прадстаўніца ўпраўлення Дзяржкамітэта судовых экспертыз па Брэсцкай вобласці Таццяна Каток.
Інцыдэнт адбыўся 17 снежня 2019 года. Таксовец звярнуўся ў Маскоўскі РАУС Брэста і паведаміў, што яго пасажыр замест грошай за праезд даў яму пісталет-кулямёт. Па яго словах, пасажыр папрасіў пачакаць каля дома, пакуль ён вернецца з грашыма. Праз нейкі час мужчына вярнуўся, але перадаў таксоўцу не грошы, а прадмет, падобны да зброі. "Для выяўлення, ці з'яўляецца канфіскаваны прадмет зброяй і ці прыдатны для стральбы, была прызначаная балістычная экспертыза", — паведаміла Таццяна Каток.
Экспертыза паказала, што гэта макет пісталета-кулямёта Судаева ўзору 1943 года. Сувенірная зброя была зробленая заводскім спосабам.
Неўзабаве міліцыянты высветлілі пасажыра, які расплаціўся такім незвычайным спосабам. Гэта быў 57-гадовы брастаўчанін. Мужчына патлумачыў, што ў яго не было з сабой грошай, таму ён выбраў такі спосаб аплаты.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
