Чыноўнікі зноў падманулі. Чаму не адкрыўся новы дзіцячы садок у Лагойску

12/09/2024 - 16:45

Калі адкрыюць новы дзіцячы садок у Лагойску?

Калі адкрыюць новы дзіцячы садок у Лагойску? / BELTA

Жыхары новага мікрараёна ў Лагойску скардзяцца, што дзіцячы садок, які ўлады абяцалі адкрыць да 1 верасня, усё яшчэ будуецца.

Спачатку дзяржСМІ пісалі, што ўвод у эксплуатацыю запланаваны на канец 2023 года, потым пра верасень 2024, але садок так і не запрацаваў.

Мы даведаліся ў мясцовых чыноўнікаў, калі нарэшце запрацуе дзіцячы садок і хто туды зможа трапіць.

Пад выглядам аднаго з бацькоў, які хоча ўладкаваць сваё дзіця ў новы садок, карэспандэнт Еўрарадыё датэлефанаваўся ў аддзел адукацыі Лагойскага райвыканкама.

Супрацоўніца сказала, што ніхто ніколі і не абяцаў, што дзіцячы садок адкрыецца раней. Хаця абяцанні былі.

Чиновники снова обманули. Почему не открылся новый детский сад в Логойске

Скрыншот з "Мінскай праўды" ад 12.12.2022

— На жаль, да ўводу ў эксплуатацыю, мы не можам вам гарантаваць, што вы зможаце трапіць менавіта ў гэты сад. Гэта абласная будоўля і мы не можам даць вам дакладныя даты. Тэрміны могуць ссоўвацца праз фінансавання.

— Але ж абяцалі, што садок адкрыюць да 1 верасня.

Скрыншот з рэгіянальнага інтэрнэт-партала "Лагойск" ад 12.03.2024

— Не, такога абяцання не было. Было заўсёды 3-4 квартал — планаваныя тэрміны ўводу. Не, даражэнькі, калі б было 1 верасня, то да нас бы з вобласці прыехалі. Такую інфармацыю ніхто безадказна распаўсюджваць не будзе. Афіцыйная інфармацыя — 3-4 квартал гэтага году, па меры паступлення фінансавання. Пакуль будаўніцтва не завершана, будынак не ўведзены ў эксплуатацыю.

— А вы думаеце, у снежні адкрыюць?

— Вядома, гэта ж абласная будоўля. Проста будаваліся школы, пытанне было трошкі адкладзенае. Але ён [дзіцячы сад — Еўрарадыё] ужо на стадыі даху і ўнутраных работ, вы можаце з'ездзіць паглядзець. Гэта ўжо назад нікуды не павернецца. Чакаем.

— А як трапіць у новы садок?

— Вам трэба стаць на ўлік тых, хто мае патрэбу на залічэнне ў садок. З сабой трэба мець пашпарт і пасведчанне аб нараджэнні дзіцяці. З гэтымі дакументамі вы прыязджаеце ў "Адно Акно" ў Лагойску. Пасля гэтага вы будзеце ўнесены ў спіс тых, хто мае патрэбу ў дзіцячым садзе. І як толькі сад будзе ўведзены ў эксплуатацыю, вам будуць прапаноўваць месца. Гэтая заява стане адпраўной кропкай.

Зразумейце яшчэ такі момант, для навучэнцаў ва ўзросце ад трох гадоў у Лагойску забяспечанасць дзіцячым садком 100%, да 3-х гадоў — 67%. Гэта значыць дзяржава прадугледзела, калі мама выходзіць з дэкрэту, то дзіця дакладна трапіць у сад, а калі хочаце аддаць яго раней, то па меры наяўнасці свабодных месцаў. Будзем спадзявацца, што ўсё складзецца добра.