У Брэсце будуюць дом на школьным стадыёне: што будзе з урокамі фізкультуры?

03/09/2024 - 12:51

Дом будуюць проста на тэрыторыі школы / @minstroybelarus

Вуліца Адамкоўская ў Брэсце, раён Рэчыца. Там блізка адна ад адной размешчаныя сярэднія школы №27 і №5, а паміж імі быў стадыён. Цяпер на яго месцы плануюць пабудаваць вялікі шматкватэрны дом.

У сеціве з'явілася відэа, дзе мясцовая жыхарка незадаволена выказваецца пра новы дом і не разумее, чаму яго вырашылі пабудаваць проста на школьным стадыёне. Яна таксама задаецца пытаннем, дзе цяпер дзеці будуць займацца фізкультурай.

Але ці ўсё так страшна на самай справе? Еўрарадыё патэлефанавала ў школы і забудоўшчыку і вось што даведалася.

“Не можа забяспечыць ажыццяўленне адукацыйнай функцыі”

Праект дома на Адамкоўскай распрацоўваў "Брэстжылбуд". У архітэктурна-будаўнічай канцэпцыі сказана, што тэрыторыя, на якой знаходзіўся стары стадыён, "не можа забяспечыць ажыццяўленне адукацыйнай функцыі (пляцоўкі не абсталяваныя спартовым інвентаром, пакрыццё разбуранае альбо адсутнічае)".

В Бресте строят дом на школьном стадионе: что будет с уроками физкультуры?

Генплан дома / brestcity.com

Таму было прынятае рашэнне пабудаваць там дом, аднак забудоўшчык абяцае выканаць работы па рэканструкцыі і аптымізацыі тэрыторыі СШ № 5.

“У нашых дзяцей ёсць усе магчымасці”

Пад выглядам занепакоенага бацькі журналіст Еўрарадыё датэлефанаваўся ў некалькі дзяржарганізацый, у тым ліку ў школы, якія знаходзяцца побач з новабудоўляй. Дырэктарка 27-й школы пацвердзіла, што дом сапраўды будуецца, а ўзамен школы атрымаюць акультураную тэрыторыю.

— Наогул у нас ёсць стадыён, яго адкрылі літаральна ўчора. Больш за тое, у нас ёсць баскетбольная і валейбольная пляцоўкі. Нават дарожкі ёсць. Якія праблемы? У нашых дзяцей ёсць усе магчымасці для заняткаў фізкультурай. А што да дома, то яго будуюць на тэрыторыі пятай школы. І я хачу вам сказаць, што інвестар, які ўкладваецца ў дом, у будучыні збіраецца пабудаваць кучу пляцовак для дзяцей. Вы не хвалюйцеся, літаральна сёння ў аблвыканкаме паказвалі праект.

У прыёмным пакоі 5-й школы нас запэўнілі, што замест старога стадыёна дзеці будуць займацца на новым. Таксама пацвердзілі, што дом сапраўды будуецца на тэрыторыі школы.

На пытанне, чаму дом узводзяць на школьнай тэрыторыі, нам адказалі, што гэтая зямля даўно належыць гораду, і рашэнне пра будаўніцтва прымаў гарвыканкам.

“Мы нічога не парушаем і дзейнічаем у рамках заканадаўства”

У "Брэстжылбудзе", які выступае заказчыкам праекта, расказалі, што для дзяцей усіх найбліжэйшых школ узвялі новы стадыён, а сама будоўля не з'яўляецца небяспечным месцам.

— Будоўлю скончаць ужо сёлета. Наколькі я ведаю, яна абгароджаная плотам і ў цэлым з'яўляецца бяспечным месцам. А новы стадыён адкрылі некалькі дзён таму, на ім будуць займацца дзеці ўсіх найбліжэйшых школ. Наша арганізацыя распрацавала праект па заданні на праектаванне. Праект прайшоў экспертызу, было праведзенае грамадскае абмеркаванне, ёсць рашэнне пра будаўніцтва, мы нічога не парушаем і дзейнічаем у рамках заканадаўства.

Мы сустракаліся з грамадзянамі, абмяркоўвалі, паказвалі, якія будуць праведзеныя працы. Калі ў вас былі нейкія незадаволенасці, то на адкрыцці стадыёна трэба было падысці да губернатара, да мэра горада і выказаць свае незадаволенасці.

“Знайшлі дзе дом будаваць”

У каментарах пад відэа з нагоды будаўніцтва дома на тэрыторыі школы меркаванні разышліся. Нехта піша, што спорт — гэта нявыгадна, а здаровыя людзі нікому не патрэбныя.

А многія пісалі, што заўсёды знойдуцца тыя, каму нешта не падабаецца.

Хтосьці здзіўляўся і нават не верыў, што дом будуюць проста на тэрыторыі школы: "Так, дом няма дзе больш будаваць. Гэта апошні ўчастак зямлі" або "Знайшлі дзе дом будаваць".