Дзе танней купляць тэхніку — у Беларусі ці ў Польшчы? Параўналі цэны

Калі вы калі-небудзь ездзілі ў Польшчу на шопінг, то, верагодна, набывалі там разнастайную бытавую тэхніку. Па-першае, у заходняга суседа амаль заўсёды танней, па-другое, можна аформіць tax free. Усё гэта дазваляе зэканоміць часам да паловы кошту ўмоўнага тэлевізара або ноўтбука.

Ці можна сёння зэканоміць на тых жа тэлевізарах, калі везці іх з Польшчы? Еўрарадыё параўнала цэны на адны і тыя ж тавары ў папулярных гандлёвых сетках Беларусі і Польшчы. І вось дзе танней. Прыкметна танней.

Тэлевізары — купляць у Польшчы ці ў Беларусі?

Хоць на Беларусь і наклалі санкцыі на пастаўку некаторых тавараў, на бытавую тэхніку яны не распаўсюджваецца. 

Спачатку параўнаем кошт тэлевізараў. Выбіраем 139-сантыметровы LG 55UT81006LA з функцыяй смарт-ТБ, вайфаем і блютузам.

У Беларусі ён на зніжцы і замест 3999 рублёў каштуе 3799. У Польшчы роўна такі ж халадзільнік вы можаце купіць за 3299 злотых (2754 рубля).

Эканомія пры куплі ў Польшчы — 1054 рубля.

Мікрахвалёўкі

Яшчэ адзін тавар, які больш выгадна купляць у Польшчы — мікрахвалёўкі.
Печку SAMSUNG умяшчальнасцю 23 літры з біякерамікі ў Мінску вы купіце за 589 рублёў (гэта са зніжкай у 110 рублёў).

Такая ж самая мікрахвалеўка ў польскай краме каштуе 599 злотых (500 рублёў).

Розніца ў цэнах на пыласосы

У адрозненне ад халадзільнікаў, пыласосы беларусы раней вазілі з Польшчы вельмі актыўна. Для параўнання выбіраем вертыкальны пыласос фірмы Dyson. Мадэль V15S DETECT SUBMARINE з фільтрам у Беларусі каштуе 3999 рублёў.

У Польшчы такі пыласос вы купіце за 3949 злотых (3297 рублёў).

Эканомія — 702 рублі.

Дзе больш выгадна купляць смартфон

Для прыкладу разгледзім адну з найноўшых мадэляў смартфонаў ад Apple. І ў Беларусі, і ў Польшчы iPhone 16 — адзін з самых папулярных тэлефонаў.

Гаджэт на 128 ГБ каштуе ў Беларусі 3799 рублёў. У Польшчы Вы зможаце яго купіць за 3899 злотых (3255 рублёў).  

А вось цэны на Samsung Galaxy S24 Ultra апынуліся ніжэйшымі ў Беларусі — 3899 рублёў, у той час як у Польшчы — 4799 злотых (4029 рублёў).

Не менш папулярны Xiaomi Redmi Note 13 у Беларусі каштуе 799 рублёў, у Польшчы столькі ж, але ў злотых (670 рублёў).

Выбіраем гульнявыя прыстаўкі

Любіце геймінг? Глядзім цэны на прыстаўкі. SONY PLAYSTATION 5 SLIM на 1 тэрабайт каштуе ў беларускай краме 2539 рублёў.

У Польшчы гэты дэвайс можна купіць танней — за 2699 злотых (2253 рублі). І тут суцэльная эканомія.

А кошты на пасудамыйкі?

Убудавальная пасудамыйная машына фірмы BOSCH са зніжкай у 110 рублёў каштуе ў беларускай краме 1779 рублёў.

У Польшчы гэты апарат каштуе прыблізна столькі ж — 2099 злотых (1752 рублі).

Кавамашыны

Аматарам кавы таксама больш выгадна купляць у Польшчы.

Так, кавамашына SIEMENS TE654319RW каштуе ў Беларусі 3849 рублёў, а ў Польшчы — усяго 3249 злотых (2713 рублёў).

Што ў выніку?

Амаль усе цэны на тэхніку, якую мы параўналі, аказаліся ніжэйшымі ў Польшчы.
 
Нагадаем таксама, што сярэдні заробак у Польшчы да выліку падаткаў складае 8140 злотых (6754,8 рубля), а ў Беларусі — 2363,4 рубля.