Дзярждэпартамент ЗША: У Беларусі "значныя праблемы ў сферы правоў чалавека"

У Беларусі захоўваюцца "значныя праблемы ў сферы правоў чалавека". Пра гэта гаворыцца ў штогадовым дакладзе Дзярждэпартамента ЗША аб сітуацыі з правамі чалавека ў свеце, які апублікаваны 14 красавіка. У "беларускім раздзеле" адзначаецца, што беларусы па-ранейшаму не маюць магчымасці змяняць урад шляхам выбараў. Што ў сістэме, пазбаўленай стрымлівання і проціваг, улады здзяйсняюць злоўжыванні, а былыя палітвязні дагэтуль не адноўленыя ў грамадзянскіх і палітычных правах. Акрамя таго, улады так і не далі ніякіх тлумачэнняў па фактах "палітычна матываваных знікненняў" , якія адбываліся ў Беларусі ў 1999-2000 гадах, інфармуе БелаПАН.

У дакладзе гаворыцца, што "Беларусь — гэта аўтарытарная дзяржава", што "ўлада сканцэнтраваная ў прэзідэнта дэ-факта і дэ-юрэ". Адзначаецца, што пасля 1994 года ўсе выбарчыя кампаніі не адпавядалі міжнародным стандартам. У дакладзе Дзярждэпартамента ЗША называюцца злоўжыванні з боку сілавых структур, у тым ліку адвольныя затрыманні грамадзян за крытыку ўлады, удзел у дэманстрацыях.

Улады ў Беларусі працягваюць абмяжоўваць грамадзянскія правы і свабоды, працягваюць адмаўляць у рэгістрацыі недзяржаўным арганізацыям, палітычным партыям, праваабарончым арганізацыям (а пасля пагражаюць ім пераследам за дзейнасць без рэгістрацыі).