Дзяржсакратар ЗША — пра візіт у Беларусь: наша партнёрства стала яшчэ мацней

Дзяржсакратар ЗША Майк Пампеа пазітыўна ацаніў свой візіт у Беларусь, Казахстан і Узбекістан. Пра свае ўражанні ён напісаў у Twitter і далучыў відэа, на якім ёсць сустрэчы з Аляксандрам Лукашэнкам і Уладзімірам Макеем.

"У Беларусі, Казахстане і Узбекістане я падкрэсліў важнасць міру, бяспекі і росквіту жыхароў усіх нашых краін, — піша Пампеа. — Я магу сказаць з упэўненасцю, што наша партнёрства стала яшчэ мацней пасля гэтага візіту".

Дзяржсакратар ЗША наведаў Беларусь 1 лютага. Ён правёў сустрэчу з Аляксандрам Лукашэнкам. Было анансаванае хуткае прызначэнне амбасадара Злучаных Штатаў у нашай краіне. Майк Пампеа заявіў, што ЗША гатовыя забяспечыць Беларусь нафтай на 100%. Праўда, эксперты сумняюцца, што такія пастаўкі будуць выгадныя нашай краіне з-за іх лагістычнай складанасці.

Па выніках візіту дзяржсакратара Злучаных Штатаў у Маскве заявілі, што не вераць у хуткае збліжэнне Беларусі і ЗША.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.