Экс-настаўнік гісторыі Андрэй Пятроўскі перапрацоўвае гуму ў калоніі
Былы настаўнік гісторыі і грамадазнаўства са Смаргоні Андрэй Пятроўскі, асуджаны да 1,5 гадоў калоніі за паклёп на прэзідэнта, працуе ў калоніі перапрацоўшчыкам гумы, паведамляюць праваабаронцы.
На ўчастак перапрацоўкі сырой гумы Пятроўскі ўладкаваўся 8 лістапада. Яго праца заключаецца ў тым, каб выцягваць металакорд з пластоў гумы, а гуму скручваць у шары альбо валікі. Напрыканцы працоўнага дня трэба здаць адзін кілаграм металакорду. У лісце з калоніі Пятроўскі піша, што норму ён перавыконвае ці амаль выконвае і што "многае залежыць ад гумы, якую прывозяць з Бабруйскага шыннага камбіната".
Як паведамляла Еўрарадыё, 25 жніўня Андрэя Пятроўскага асудзілі за тое, што ў сакавіку гэтага года ён паказаў 11-класнікам на ўроку грамадазнаўства відэаролік "Конституция ушла в проституцию!" з лагатыпам, які прызнаны экстрэмісцкім. Сярод вучняў быў сын мясцовай чыноўніцы, які зняў урок на мабільны тэлефон і выклаў запіс у "сямейны чат". Пасля гэтага настаўніка звольнілі і завялі крымінальную справу.
