Эпідэміёлагі абвяргаюць брытанскі артыкул пра непрыдатнасць нашай вады для піцця

Газета The Daily Mail склала для турыстаў карту, дзе пазначыла краіны, у якіх можна піць ваду з-пад крана. У Беларусі — нельга. Базуецца яна на інфармацыі, атрыманай ад Цэнтра па кантролі і прафілактыцы захворванняў Злучаных Штатаў Амерыкі. Па іх меркаванні, у Беларусі лепш набываць ваду ў бутэльках, бо ў кранах яна небяспечная.

“Цікава па якіх крытэрыях яны гэта ацэньвалі, — здзіўляецца супрацоўніца Цэнтра гігіены і эпідэміялогіі Гродна. — У нас ёсць санітарна-эпідэміялагічнае заканадаўства, ёсць адпаведныя санітарныя нормы якасці пітной вады, якая падаецца насельніцтву. Па ўсіх паказчыках наша вада праходзіць. І вось тут мне хацелася б даведацца, на базе чаго брытанцы зрабілі такую выснову”.

Пры гэтым, як даведалася Еўрарадыё, градацыі якасці вады па краіне не існуе, бо тэрыторыя краіны знаходзіцца ў адным поясе, гідрагеалагічны складнік практычна паўсюль аднолькавы, таму нашы падземныя воды маюць прыблізна падобны склад. Адзіная праблема — павялічаная канцэнтрацыя жалеза. Натуральна, што з-за гэтага вада можа быць нясмачнай і пакідаць сляды. Але для здароўя гэта бяспечна.

“Калі вада паступае да спажыўца па цэнтральным водазабеспячэнні, то яна ж праходзіць шэраг этапаў ачысткі, — працягвае спецыялістка. — У тым ліку і абезжалезванне. Ну, і калі па мікрабіялагічных паказчыках нестандартная, то яе абеззаражваюць. Але нестандартныя мікрабіялагічныя паказчыкі ў нас рэдкасць. За паўгода ў мяне былі толькі два такія выпадкі з некалькіх тысяч узятых аналізаў”.

Пры гэтым, гарантаваць высокую якасць вады можа толькі для тых спажыўцоў, якія карыстаюцца цэнтралізаваным водазабеспячэннем. На вёсках, дзе ваду бяруць са студняў, сітуацыя горшая.

“У студнях у нас прысутнічаюць нітраты. Гэта перавышэнне гігіенічнага нарматыву, і яна сапраўды непрыдатная для піцця. У тэхнічных мэтах ужываць яе можна. Тыя, хто хвалюецца, можа набываць бутэляаваную ваду. Але ў нас жа людзі ўсё роўна п’юць з нітратамі і нібыта нічога не адбываецца…”

На думку брытанскіх журналістаў, найбольш бяспечная вады з-пад крана — у краінах Заходняй Еўропы. Апроч Беларусі, піць водаправодную ваду не раяць у Эстоніі, Літве, Малдове, Украіне, Расіі, Турцыі, Грузіі, Арменіі, Азербайджане, Казахстане, Балгарыі, Чарнагорыі, на Кіпры і ў шэрагу іншых краін.