Іван Караічаў: “КХЛ не дазволіла праводзіць беларусізацыю “Дынама-Мінск”

Прадстаўнікі нашых топавых клубаў у розных гульнявых відах спорту сышліся ў думцы, што беларуская мова трапна дапамагае ў раскрутцы каманд. Круглы стол на гэту тэму адбыўся у межах рэкламнага фестывалю AD.NAK! у сераду 29-га траўня.

Аказалася, што нават ХК “Дынама-Мінск”, які многія папракаюць у непавазе да нацыянальнай мовы, спрабаваў актыўна ёй карыстацца.

“Год-два таму мы прадпрымалі тытанічныя высілкі, каб прыўнесці часцінку беларускасці ў дзейнасць клуба. Мы хацелі, каб прозвішчы гульцоў на форме былі напісаныя па-беларуску, ― распавядае пра патрыятычныя задумы кіраўнік прэс-службы “Дынама-МІнск” Іван Караічаў. ― Нам КХЛ гэтага не дазволіла. Праз нейкі час з’явілася ўказанне, каб прозвішчы ўсіх гульцоў былі напісаныя лацінкай. Мы сказалі: “Добра, хай прозвішча Кулакоў будзе напісана KULAKOU”. Нам і гэтага не дазволілі, сказалі, што прозвішча Кулакоў будзе напісана KULAKOV. Вось уласна і ўсё. Мы выступаем у міжнароднай лізе, штаб-кватэра знаходзіцца ў Маскве. Маем тое, што маем”.

Еўрарадыё: Можа быць, клуб мог бы пачаць са сваіх заўзятараў і клубнага сайта, дзе няма версіі на роднай мове?

Іван Караічаў: Справа вось у чым. Прыкладна 20% наведвальнікаў прыходзяць на сайт з-за межаў Беларусі, пераважна — з Расіі. Мы гуляем у міжнароднай лізе. Руская мова павінна быць ці асноўнай, ці адной з асноўных. Што тычыцца беларускамоўнай версіі, мы гатовыя гэта зрабіць, але павінен быць рэсурс для рэгулярнага і якаснага абнаўлення. У дзень беларускай мовы ўсе навіны складаліся па-беларуску. Недастаткова напісаць тры словы і заяўляць, што мы робім унёсак у беларусізацыю. Як толькі мы атрымаем магчымасць, мы зробім беларускамоўную версію сайта. Тое, што ў клуба самы вялікі бюджэт, не азначае, што нашы рэсурсы бязмежныя. У нас у клубе да гэтага вельмі добрае стаўленне. Але ёсць складанасці з тым, што ў нас маленькі штат і мы гуляем у міжнароднай лізе. Калі мы зможам прыйсці да якаснага напаўнення сайта ці зрабіць нейкі іншы беларускамоўны фінт, які будзе якасным і крэатыўным, мы абавязкова гэта зробім.

P.S. Па зняважлівай логіцы КХЛ, якая дэманструецца ў дачыненні да Беларусі, латыша Рэдліхса трэба пераназваць у Рэдліхіна, а чэха Міхала Рэпіка ў Міхаіла Рэпкіна.  

Дынамаўцам забаранілі пісаць па-беларуску нават лацінкай