Кабінет Ціханоўскай: выйсці з саюзаў з Расіяй і пазбавіцца расійскіх войскаў

"Зараз вырашаецца лёс нашай краіны. Стаіць пытанне існавання нашай дзяржавы. Толькі ад нас з вамі залежыць ці зможам мы вызваліцца ад імперскага гнёту Расіі і пабудаваць вольную незалежную дзяржаву Рэспубліку Беларусь", — гаворыцца ў заяве АПК.

АПК заявіў пра тое, што дэнансуе дамовы аб стварэнні Саюзнай дзяржавы Беларусі і Расіі, аб’яўляе аб выхадзе Рэспублікі Беларусь з АДКБ, ЕАЭС і СНД. Кабінет лічыць недапушчальным удзел беларускіх вайскоўцаў ва ўзброеным канфлікце ў Расіі.

“У гэтай сувязі патрабуем ад Дзяржаўнага Памежнага Камітэту Рэспублікі Беларусь неадкладна зачыніць мяжу паміж Беларуссю і Расіяй, ад Міністэрства абароны Рэспублікі Беларусь – забяспечыць вывад расійскіх войскаў з Беларусі, спыніць падрыхтоўку да размяшчэння ядзернай зброі на тэрыторыі Беларусі”, — гаворыцца ў заяве.

Прыярытэтам цяпер АПК называе падтрымку Украіны ў вайне супраць Расіі. Таксама кабінет "заклікае нацыянальна-арыентаваныя сілы Беларусі падтрымаць дадзенае рашэнне і далучыцца да Аператыўна-сітуацыйнага штабу" і да плана "Перамога".