Кангрэс трансгранічнага супрацоўніцтва пройдзе ў Любліне 6–9 кастрычніка
Трансгранічнаму дыялогу ў Любліне ўжо 10 гадоў / kongres.lublin.eu
Мы знаходзімся на парозе пераўтварэнняў, якім пандэмія COVID-19 надала новую дынаміку. Сённяшнюю сітуацыю мы часцей за ўсё вызначаем словамі: зменлівасць, нявызначанасць, складанасць, двухсэнсоўнасць. Мы задаёмся пытаннем, як будаваць і развіваць эканоміку без эксплуатацыі — без эксплуатацыі людзей, без эксплуатацыі вычарпальных рэсурсаў, пазбягаючы дэградацыі навакольнага асяроддзя.
Як будаваць чалавечыя адносіны і мясцовую супольнасць у так моцна палярызаваным грамадстве, будучы ў сітуацыі, калі неабходнасць захоўваць сацыяльную дыстанцыю не спрыяе ідэі супольнасці, а паглыбляе ізаляцыю. Якія прававыя і арганізацыйныя рашэнні дазволяць ліквідаваць наяўную няроўнасць?
А як наконт салідарнасці і сацыяльнай адчувальнасці — якімі грамадзянамі мы аказаліся перад тварам цяжкіх праблем? Як органы мясцовага самакіравання, школы, установы культуры, бізнес і грамадскія арганізацыі спраўляюцца з новымі выклікамі?
Мы ўстаём перад такімі дылемамі. Мы хочам пагаварыць пра гэтыя і іншыя праблемы сёння, як мы гэта робім у Любліне ўжо на працягу 10 гадоў, а менавіта — у асяроддзі практыкаў трансгранічнага супрацоўніцтва.
Сёлета ўсё будзе крыху інакш. Не будзе асабістых сустрэч, поціскаў рук, вячэрніх прагулак па Старым горадзе. Аднак нас чакае цікавая інтэлектуальная прыгода, якая заўсёды з'яўлялася візітнай карткай нашага Кангрэса.
Дзевяць папярэдніх гадоў Кангрэса — гэта сотні дыскусійных панэляў па многіх напрамках, нязмерная колькасць праектных, дзелавых і прыяцельскіх сустрэч, новых знаёмстваў, падтрыманне міжнароднага партнёрства і дружбы. Люблін, размешчаны на гістарычнай мяжы дзвюх вялікіх плыняў еўрапейскай культуры са сваім genius loci, заўсёды быў відавочным месцам правядзення кангрэса, які звязвае Еўрапейскі саюз і "Усходняе партнёрства".
Мы хочам, каб Люблін працягваў ім быць і ў цяперашняй сітуацыі. Свет не стане зноў такім, якім мы яго ведалі. Нам неабходна пераацаніць і перавызначыць спосабы мыслення пра рэальнасць вакол нас. Таму мы вырашылі сёлета адаптаваць мадэль Кангрэса да новай сітуацыі.
Прымаючы рашэнне пра правядзенне анлайн-мерапрыемства, у першую чаргу мы думалі пра бяспеку ўдзельнікаў. Але таксама мы хацелі пагаварыць пра праблемы будучыні ва ўмовах, з якімі сёння сутыкаецца ўвесь свет. Без самалётаў, без гатэляў, але з магчымасцю спакойнага разважання, не турбуючыся пра маскі і дэзынфікавальныя сродкі.
Мы выбралі чатыры ключавыя напрамкі для панэльных дыскусій і семінараў: мясцовае самакіраванне, культура, эканоміка і грамадства. Мы хочам зірнуць на час пандэміі і будучыя выклікі з перспектывы трох сектараў: публічнага, камерцыйнага і грамадскага. Перш за ўсё праз прызму канкрэтнага чалавека, яго перажыванняў, страхаў і няўпэўненасці.
Мы хочам паказаць актыўнасць грамадзянскай супольнасці ў аказанні дапамогі і падтрымкі. Думаючы пра ідэю салідарнасці, супольнасці і спагады да самых слабых. Мы пагаворым пра тое, як выкарыстоўваць велізарны патэнцыял нізавых грамадзянскіх ініцыятыў і ўключыць іх у асноўнае рэчышча публічнай дзейнасці. Потым, праз прызму бізнесу, — прааналізуем будучыя рэсурсы развіцця і росту, задаючыся пытаннем, як, дзе і ці варта яго вымяраць, якія яго межы.
Інтрыгоўным з'яўляецца таксама пытанне аб новых бізнес-мадэлях ва ўмовах усё больш дыгіталізаванай эканомікі. Ці можна чакаць інавацый у гэтай сферы і росквіту сучаснага прадпрымальніцтва? Задача мясцовага самакіравання — знайсці мадэль, якая спалучае мудрую эмпатыю з эфектыўнасцю дзеянняў. Таму варта паглядзець на сацыяльныя інавацыі ў кантэксце пошуку новай парадыгмы кіравання, якая спалучае ідэі салідарнасці і эфектыўнасці.
Цікавы будзе адказ на пытанне кіравання ва ўмовах крызісу і ўрокаў на будучыню. Як перад тварам непазбежнай эканоміі (зніжэнне даходаў) можна рэалізаваць грамадскія задачы ў сітуацыі, калі патрабаванні жыхароў пастаянна растуць. Магчыма, варта пераарыентаваць працэсы і, абапіраючыся на прыклады з дзелавога свету, выбудоўваць кампетэнцыйныя мадэлі, дэталёва разлічваць затраты, смялей пераходзіць на аддаленую працу.
Ключавое значэнне мае арганізацыйная і ментальная рэканструкцыя публічных устаноў. На аснове кампетэнцый, якія разумеюцца як веды, навыкі і стаўленне, дапоўненых талентамі і досведам, варта адбіраць супрацоўнікаў для выканання задач у адпаведнасці з іх схільнасцю, найлепшым чынам выкарыстоўваючы іх патэнцыял. У новай мадэлі мы будзем ацэньваць іх, грунтуючыся не на выдаткаваным часе і гатоўнасці выконваць дзеянні, а на рэалізаваных задачах і выніках.
І нарэшце, культура, заўсёды шырока прадстаўленая на нашых кангрэсах. Нагадаем, што менавіта Кангрэс культуры "Усходняга партнёрства" ў 2011 годзе паклаў пачатак практыцы люблінскіх сустрэч "паміж Усходам і Захадам". У гэтай сферы існуе мноства выклікаў і праблем.
Як эфектыўна функцыянаваць ва ўмовах непазбежнага абмежавання сродкаў, што выдзяляюцца на культуру? Якія стратэгіі варта выбіраць гарадам, у развіцці якіх адной з рухаючых сіл з'яўляецца культурны турызм? Культура сілкуецца асабістымі сустрэчамі, адкрытасцю і спантаннасцю. Як ствараць незвычайныя мастацкія формы і атрымліваць захапляльны досвед у віртуальным свеце?
Мы адчуем гэта падчас Кангрэса, удзельнічаючы ў культурных мерапрыемствах, напрыклад, у форме стрымінгу музычна-візуальных праектаў, выставы сучаснага мастацтва на платформе Steam або, нарэшце, літаратурных сустрэч, якія стануць падставай для натхняльных дыскусій пра сённяшнія рэаліі, не толькі пандэмічныя, але і палітычныя. Арганізацыяй гэтых інавацыйных праектаў займаюцца вядомыя гарадскія ўстановы культуры: Люблінскі цэнтр культуры, Майстэрні культуры і Галерэя "Лабірынт".
У рамках Кангрэса мы хочам гаварыць пра актуальныя дылемы — як сумясціць адкрытасць на людзей, змены і новыя тэхналогіі з адказнасцю за бяспеку? Гаворка ідзе пра новае разуменне партысіпацыі, як знешняй — удзелу грамадзян, так і ўнутранай — якая максімальна выкарыстоўвае рэсурсы арганізацыі і адначасова павялічвае ўплыў супрацоўнікаў на працэсы прыняцця рашэнняў і кірунак развіцця.
У цяжкія, экстрэмальныя часы ўзнікае спакуса прымаць за заслонай адвольныя рашэнні ад імя грамадзян, але без іх удзелу. У эпоху трансфармацый і нявызначанасці надзвычай важным становіцца разуменне жыхарамі складаных з'яў, неабходнасці эканоміі, абгрунтаванне няпростага выбару прыярытэтаў (чаму мы выбіраем адны інвестыцыі і адкладаем іншыя, якія ўстановы лічым "менш важнымі" пры дзяленні бюджэту).
Таму сёлета мы арганізуем сустрэчу дэпутатаў мясцовых саветаў з розных гарадоў Еўропы. Важна тое, як яны бачаць бягучыя прыярытэты і пра якія праблемы ім сігналізуюць жыхары. Двухгалоссе мясцовай выканаўчай улады (мэры) і ўлады заканадаўчай (дэпутаты гарсаветаў) будзе каштоўным поглядам на бягучую сітуацыю і будучыя выклікі. І хоць мы сустрэнемся ў іншай, віртуальнай прасторы, мы хочам захаваць тыя элементы Кангрэса, якія павышалі яго каштоўнасць, у прыватнасці Біржу грантадаўцаў, Форум партнёраў і Конкурс перадавых практык.
Біржа дазваляе даведацца пра магчымасці атрымання сродкаў у рамках канкрэтных грантавых праграм. Форум партнёраў — гэта платформа для зносін і абмену досведам паміж арганізацыямі, якія шукаюць партнёраў для рэалізацыі міжнародных праектаў. Дыстанцыйная мадэль з'яўляецца для нас вялікім выклікам, але дзякуючы адбору, які праводзіцца, мы будзем мець магчымасць сустрэць цікавых, не выпадковых людзей.
Важным элементам Кангрэса з'яўляецца Конкурс перадавых практык, які папулярызуе найбольш цікавыя рашэнні, якія могуць дапамагчы справіцца з наступствамі пандэміі COVID-19 у пяці катэгорыях: мясцовае самакіраванне, культура і турызм, адукацыя, сацыяльная дапамога і прадпрымальніцтва. Мы хочам паказаць як мага больш шырокую карціну незвычайных практык і інавацыйных рашэнняў.
Запрашаем да ўдзелу ў Конкурсе органы мясцовага самакіравання, грамадскія арганізацыі, нефармальныя групы, школы, універсітэты і прадпрымальнікаў.
Усіх зарэгістраваных удзельнікаў Кангрэса мы запрашаем прагаласаваць за адну з конкурсных практык у галіне вырашэння праблем, якія ўзнікаюць падчас пандэміі COVID-19. Для галасавання будуць прапанаваныя па тры практыкі ў пяці конкурсных катэгорыях, у кожнай з якіх Вы можаце выбраць толькі адну практыку, за якую хочаце аддаць свой голас. Узнагародай для лаўрэатаў будзе тытул "Найлепшая практыка Кангрэса трансгранічнага супрацоўніцтва — Люблін 2020" і шырокая іх прамоцыя.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
