“Кормім прэзідэнта, але на заробках не заўважаем, каго кормім”
Еўрарадыё даведалася, адкуль на стол Лукашэнкі трапляюць яблыкі ды бульба.
На сайце Кіраўніцтва справамі прэзідэнта Еўрарадыё знаходзіць аб'яву аб продажы маласольных агуркоў — 5600 рублёў за кіло.
У гандлёвым аддзеле гаспадаркі “Усход”, якая і адносіцца да Кіраўніцтва, пытаемся, хто замаўляе маласольныя агурочкі ад кіраўніка краіны.
“Вайсковыя часткі ў асноўным. Мы выйгралі тэндар і пастаўляем ім бочкамі па 65 літраў. Піцэрыі таксама замаўляюць разам з сырам, крамы розныя”, — кажуць у гандлёвым аддзеле і дадаюць, што ўсе гуркі прадалі яшчэ да Новага года.
Пытаемся, чаму не назвалі брэнд прэзідэнцкім.
“Мы і так Кіраўніцтва справамі прэзідэнта — ведаюць у нас і так усе. Хоць нашу прадукцыю і так есць прэзідэнт, але мы так сціпленька”, — кажуць у гандлёвым аддзеле і адзначаюць: “Па заробках не адчуваецца, каго мы там кормім. 3 мільёны. Калі не верыце, прыязджайце, пакажам разлікоўкі!”.
У гандлёвым аддзеле распавядаюць, што канкрэтна пастаўляюць у Адміністрацыю кіраўніка дзяржавы — бульбу, яблыкі, ягады.
“У асноўным ідзе ў Адміністрацыю чырвоная бульба — Рэд Скарлет. І разварваецца, і смачная — добры сорт. Яблыкі? Апошнім разам, гэта было тыдні тры-чатыры назад, завозілі шэсць скрыняў яблыкаў сорту Імант і Вербнае. Гэта зімовыя яблыкі. Асеннія сарты ўжо ўсё — пайшлі на перапрацоўку. Мы многа што пастаўляем: клубніцы, маліны. Але цяпер клубніцаў-малінаў ўжо няма, толькі ўлетку пастаўляем. Адбіраецца самае лепшае. Калі трэба — завозім у Кіраўніцтва справамі. Усё сур’ёзна”.
На сайце прадпрыемства бачым, што гаспадарка вырошчвае шмат садавіны, гародніны, ягад, а таксама варыць сыры, робіць саленні ды закваскі.
Галоўны аграном “Усходу” Ігар Пратасеня расказвае, што іх гаспадарка вырошчвае каля дваццаці сартоў яблыкаў.
Аграном заўважае, што апрацоўку культур робяць па мінімуме: “не пятнаццаць разоў на год, а толькі чатыры”, а бульбу апрацоўваюць ад фітафторы.
“Прадукцыя праходзіць аналіз ў нашай лабараторыі, і лабараторыі ў Сенніцы. Добрыя сарты ў нас, яблыкам пахне, у нас няма ніякай польскай селекцыі, толькі беларуская”, — кажа аграном.
